Sherhan Murtazanyń 90 jyldyǵyn joǵary deńgeıde uıymdastyrý kerek – senator

NUR-SULTAN. QazAqparat – Senat depýtaty Abdaly Nurálıev kórnekti jazýshy, qazaq ádebıetiniń korıfeıi Sherhan Murtazanyń týǵanyna 90 jyl tolýyn joǵary deńgeıde atap ótýdi usyndy, dep habarlaıdy QazAqparat tilshisi.

Bul týraly depýtat Premer-Mınıstr Álıhan Smaıylovtyń atyna depýtattyq saýal joldady.

Kórnekti tulǵanyń mereıtoıyn laıyqty atap ótý úshin senator halyq jazýshysynyń ómiri men shyǵarmashylyǵy týraly derekti fılm túsirýdi usyndy.

Sonymen qatar, depýtat halyqaralyq ǵylymı-praktıkalyq konferentsııa, tanymdyq is-sharalar ótkizýdi, Nur-Sultan men Almaty qalalaryndaǵy kóshelerge, sondaı-aq elordadaǵy jańadan boı kótergen mektepterdiń birine jazýshynyń esimin berýdi usyndy.

«Búkil ǵumyryn ulttyq mádenıet pen ádebıettiń damýyna arnap, keıingi urpaqqa rýhanı baı mura qaldyrǵan qalamger Sherhan Murtaza Parlamenttiń tórinde eldiń sózin suńqardaı daýsy sańqyldap sóıledi. El, jer, til máselelerin ótkir kóterdi. Jazýshy shyǵarmashylyǵyn keńinen nasıhattaý jastardyń rýhanı-adamgershilik damýyna oń áser etip, tulǵa bolyp qalyptasýyna zor septigin tıgizedi», - dedi A. Nurálıev.

Aıta keteıik, halyq jazýshysy Sherhan Murtazanyń Jýaly aýdany Talapty aýylynda turǵan úıi mýzeıge aınalady.

Budan bólek óńirdegi tórt mektep qabyrǵaly qalamgerdiń esimin enshilegen. Birtýar tulǵanyń eskertkishin salý máselesi de qaralyp jatyr.