Sheremetanyń promoýteri Golovkınmen tıtýldyq jekpe-jektiń jańa datasyn aıtty

NUR-SULTAN. QazAqparat – Polsha boksshysy Kamıl Sheremetanyń (21-0, 5 KO) promoýteri Andjeı Vasılevskı onyń IBF jáne IBO tujyrymdamalary boıynsha orta salmaqtaǵy álem chempıony, qazaqstandyq boksshy Gennadıı Golovkınmen (40-1-1, 35 KO) jekpe-jeginiń jańa datasyn aıtty. Bul týraly QazAqparat Sports.kz saıtyna silteme jasap habarlaıdy.

GGG-diń Sheremetamen kezdesýi IBF tıtýlyn qorǵaý úshin mindetti bolmaq.

«Biz olardyń (Golovkın komandasy) telefonmen habarlasýyn kútip júrmiz. Jekpe-jek qazan aıynyń basynda ótýi tıis edi, alaıda bul data birneshe ret ózgerdi», - degen promoýterdiń sózderin keltiredi RingPolska.

Eske sala ketsek, bastapqyda Golovkın-Sheremeta arasyndaǵy aıqas kóktemge josparlanǵan, odan keıin maýsym aıyna aýystyryldy, biraq koronavırýsqa baılanysty uıymdastyrýshylar ony qaıta ózgertýge májbúr boldy. Boksshylardyń kezdesýi AQSh-ta ótýi múmkin.