Shengen vızasyn alý protsesi tolyqtaı tsıfrlandyrylmaq

NUR-SULTAN. QazAqparat – Konsýldyqqa barý bıometrııalyq sáıkestendirgishterdi jınaýǵa alǵash ótinim beretinder, málimetteri ózgergen nemese jańa qujat alǵandar úshin ǵana mindetti bolady, dep habarlaıdy QazAqparat EK saıtyna silteme jasap.

«Eýropalyq komıssııa shengen vızasyn alý protsesin tsıfrlandyrýdy usynady. Bul rette vızalyq japsyrmany almastyryp, ótinishti eýropalyq onlaın-vıza platformasy arqyly qashyqtan berý múmkindigin engizý qarastyrylyp otyr. Jańa paktide 2025 jylǵa qaraı vızalyq protsedýrany tolyqtaı tsıfrlandyrý maqsaty qoıylǵan»

delinedi EK málimdemesinde.

EK paıymdaýynsha, bul sheshim «ótinish berýshige vızany naqty baratyn elinen emes, anaǵurlym tezirek rásimdep berýdi usynatyn Shengen kelisimi bar ózge memleketten satyp alýǵa» qajettilik qaldyrmaıdy. Demek, vıza alýshynyń ýaqyty men qarajaty únemdeledi.

«Sondaı-aq, vıza alý protsesin tsıfrlandyrý japsyrmalarǵa qatysty jalǵan jasalý, alaıaqtyq pen urlyq sııaqty yqtımal qaýipterdi qysqartady. Sonymen birge, bul qadam Eýroodaqtyń memlekettik qyzmetterdi modernızatsııalaý men tsıfrlandyrýdy yntalandyrý jónindegi ustanymyna sáıkes keledi»

, - deıdi EK.

Eýropalyq komıssııanyń bul usynysy Eýroparlament jáne Eýroodaq Keńesi tarapynan maquldanýy kerek.

«Sodan keıin múshe memleketterdiń ortaq onlaın-vızalyq platformaǵa aýysýyna 5 jyl ýaqyty bolady. Platforma 2024 jyly jasaqtalyp, 2026 jyly iske qosylýy múmkin. Aýysýǵa beriletin bes jyldyq merzimdi esepke alǵanda, barlyq múshe memleketter ony 2031 jyly qolana alady»

, - dep habarlaıdy EK.

Eske sala ketsek, 1 sáýirden bastap qazaqstandyqtar Koreıaǵa jáne Oman Sultandyǵyna vızasyz bara alady.