Sheneýnikterdiń kesirinen bıznes bankrotqa ushyrap jatyr - Tımýr Qulybaev

ASTANA. QazAqparat - «Atameken» UKP Prezıdıým tóraǵasy Tımýr Qulybaevtyń aıtýynsha, qazirgi zańnamada memlekettik qyzmetshilerdiń jaýapkershiligi kórsetilgen. Sonyń ishinde tártiptik, ákimshilik, tipti qylmystyq jaza da bar, dep xabarlaıdy QazAqparat tilshisi.

«Búginde sheneýnikterdiń kesirinen tutas kásiporyndar jabylyp jatady. Resmı málimetke sáıkes, qylmystyq ister boıynsha jaýapqa tartylǵan kásiporyndardyń úshten biri jabylyp qaldy. Bul - úlken shyǵyn. Bárimiz jumys oryndaryn ashyp jatyrmyz, bızneske jaǵdaı jasaımyz. Sosyn bir kúnniń ishinde jaýyp tastaımyz. Munyń bári bızneske de, memleketke de tıimsiz. Bizde iri kásiporyndardyń da bankrot bolǵan jaǵdaılary az emes. Aýyl sharýashylyǵy salasynda ondaı oqıǵalar jıi kezdesedi», - dedi Tımýr Asqaruly bıznestiń quqyqtary men zańdy múddelerin sotta qorǵaýǵa arnalǵan forýmda.

Ulttyq kásipkerler palatasy basshysynyń aıtýynsha, búginde memlekettik qyzmetshilerdiń jaýapkershiligin kúsheıtý kerek. Bul - «Atameken» UKP ustanymy. «Sotta memlekettik qyzmetshilerdiń kesirinen bızneske úlken zııan kelse, ondaı sheneýnikterge qatysty naqty shara qoldanýymyz qajet. Sonda bıznes óziniń qorǵalýyna senimdi bolady», - dep atap kórsetti Tımýr Qulybaev.

Aıta keteıik, búgin QR Joǵarǵy soty men «Atameken» UKP otandyq bıznesti birlesip qorǵaýǵa ýaǵdalasty. Osyǵan oraı, arnaıy jol kartasy rásimdeldi.