Sheneýnikterdi petıtsııa arqyly ornynan alýǵa bola ma

ASTANA. QazAqparat – Qazaqstandyqtar petıtsııa jazý arqyly sheneýnikterdi qyzmetinen bosata ala ma? Bul saýalǵa Aqparat jáne qoǵamdyq damý mınıstrligi Azamattyq qoǵam isteri komıtetiniń tóraǵasy Madııar Qojahmet jaýap berdi, dep habarlaıdy QazAqparat tilshisi.

«Laýazymdy qyzmetke taǵaıyndaý jáne bosatý jónindegi normatıvtik rásimder bekitilgen. Onda atalǵan protseske jurtshylyqty tartý kózdelgen. Búginde keıbir aýyl ákimderin halyq ózi saılap jatyr. Bıyl aýdan ákimderiniń saılaýy ótedi. Bul mehanızm jaýapkershilikti tartýdy qamtyp, atalǵan baǵytta tıimdi áreket etýge múmkindik beredi. Osy oraıda biz laýazymdy qyzmetke taǵaıyndaý (ákim, mınıstr, depýtat) jáne bosatý máselesin petıtsııa jazýǵa ruqsat taqyryptar qataryna qosqan joqpyz», - dedi Madııar Qojahmet «Amanat» partııasy alańynda ótken baspasóz máslıhatynda.

Eske salsaq, ótken jyly 7 jeltoqsanda Májilistiń jalpy otyrysynda «Qoǵamdyq baqylaý týraly» zań jobasy men qoǵamdyq baqylaý júrgizý tártibin retteıtin ilespe qujat qaralǵan edi. Atalǵan zań jobasy arqyly petıtsııany berý men qaraýdyń erekshe tártibi belgilenbek.

Buǵan deıin Májilis depýtaty Edil Jańbyrshın petıtsııaǵa jazýǵa tyıym salynatyn taqyryptarǵa qatysty túsinik bergen bolatyn.