Sheneýnikter normalardy eki túrli túsindirýdi paıdalaný tájirıbesin toqtatýy qajet – Alık Shpekbaev
«Jańa formatta sybaılas jemqorlyqqa qarsy saraptamadan 3,5 myńnan astam NQA jobasy ótti. Bul rette táýelsiz sarapshylardyń kúshimen 7,5 myńnan astam sybaılas jemqorlyq olqylyqtary anyqtaldy. Osyǵan oraı, ortalyq jáne jergilikti atqarýshy organdardaǵy barlyq áriptesterime aıtatynym: sheneýnikterge óz betinshe sheshim qabyldaýǵa múmkindik beretin normalardy eki túrli túsindirýdi paıdalaný tájirıbesin toqtatý qajet. Quqyqtyq qaqtyǵystardy týdyratyn bulyńǵyr jáne dıskretsııalyq tujyrymdar ótken shaqta qalýy tıis. Biz óz tarapymyzdan saraptamanyń tıimdiligin dáıekti túrde arttyratyn bolamyz, sonyń ishinde jasandy ıntellekti engizý esebinen», - dedi Alık Shpekbaev agenttiktiń alqa otyrysynda.
Onyń aıtýynsha, Prezıdent tapsyrmasyna sáıkes barlyq óńirde volonterler men qoǵam belsendileriniń arnaıy toptary 1,5 myń monıtorıng jasap, 10 myń dárihana, medıtsınalyq mekemeler men qoımalardy qamtydy. Gýmanıtarlyq kómekti sońǵy alýshyǵa deıin jetkizdi.
«Azǵana ýaqytta «SQ-Farmatsııa» men Medıtsınalyq saqtandyrý qorynyń qyzmetindegi jemqorlyq táýekelderine tereń taldaý jasaý – olardyń ishki bıznes protsesteriniń barynsha ashylýyna yqpal etti. Pandemııa áli de jalǵasýda. Sondyqtan bizdiń maqsatymyz – koronavırýspen kúreske bólingen bıýdjet qarajatyn odan ári qadaǵalaý jáne qoǵamdyq baqylaýǵa azamattardy burynǵydan da kóbirek jumyldyrý» - dedi Alık Shpekbaev.