Shemonaıha – Óskemen tasjolyn jóndeý máselesi depýtattardyń baqylaýynda

<p>ASTANA. KAZINFORM - Májilis depýtattary, &laquo;AMANAT&raquo; partııasy fraktsııasynyń músheleri Ulyqbek Tumashınov pen Erlan Saırov shekaralyq Shemonaıha aýdanynyń turǵyndarymen kezdesti. Onda óńirdegi ınfraqurylymdy damytý máseleleri kóterildi.&nbsp;</p>

Atap aıtqanda, turǵyndardy «Shemonaıha – Óskemen» tasjolyn jóndeý máselesi, Úbi ózeni arqyly ótetin avtomobıl kópirin jóndeý, ınternet baılanysynyń sapasy jáne basqa da máseleler tolǵandyrýda.

– Bizdiń qalamyz kishkentaı, munda shamamen 20 myń adam turady. Biraq biz de kez kelgen basqa qala sııaqty sapaly medıtsınalyq qyzmetke muqtajbyz. Bizdiń aýdandyq aýrýhananyń ǵımaraty 1968 jyly salynǵan. Al sońǵy kúrdeli jóndeý jumystary 10 jylǵa jýyq ýaqyt buryn júrgizilgen. Іshine kirýge qorqasyń. Qazir dárigerlerge kóterme járdemaqy tólenetini belgili boldy, sondyqtan bizde de bilikti dárigerler sany artady dep úmittenemi, – dedi jergilikti turǵyn Valentın Alıfanov.

Depýtat Erlan Saırov Densaýlyq saqtaý máseleleri boıynsha zańnamalyq túzetýlerge sáıkes aýylǵa kelgen medıtsına qyzmetkerleri 100 ETJ mólsherinde birjolǵy tólem alatynyn atap ótti (bul 2024 jylǵy esepteý boıynsha 8,5 mln teńge). Sondaı-aq balabaqshalarǵa qabyldaý kezinde medıtsına qyzmetkerleriniń balalary úshin basymdylyq qarastyrylǵan, dárigerlerge qatysty quqyqtyq qorǵaý kúsheıtilgen jáne taǵy basqalar bar. Bul jumys «AMANAT» partııasynyń saılaýaldy baǵdarlamasyn iske asyrý aıasynda júrgiziledi jáne jergilikti jerlerde medıtsınalyq kadrlardyń tapshylyǵyn júıeli túrde sheshýge múmkindik beredi.

Májilismenderdiń aıtýynsha, mundaı kezdesýler óte mańyzdy. Sebebi, osyndaı júzdesýler barysynda halyq qalaýlylary Prezıdent tapsyrmalary men saılaýaldy baǵdarlamasynyń oryndalý barysyn qadaǵalap qana qoımaı, turǵyndardy tolǵandyrǵan máselelerge qulaq túrip, jergilikti bıliktiń sol problemalardy sheshýine yqpal etedi.

– Memleket basshysy Qasym-Jomart Toqaev aýyldyq aýmaqtardy jáne shekaralyq aýdandardy damytýǵa erekshe nazar aýdarady. Basty maqsat – halyqtyń kóshýin azaıtý, adamdardyń ómir súrýine qolaıly jaǵdaı jasaý, shekaralyq aýdandardyń ekonomıkalyq damýyna jańa serpin berý. Bul – «AMANAT» partııasynyń saılaýaldy baǵdarlamasynyń mańyzdy baǵyty. Barlyq kóterilgen máselelerdi erekshe baqylaýǵa alamyz. Atap aıtqanda, bıyl Shemonaıha men Óskemen arasyndaǵy sapaly zamanaýı joldyń qurylysyna tender ótkiziledi, – dedi Erlan Saırov.

Sonymen qatar halyq qalaýlylary Shemonaıha qalasyndaǵy mektep qurylysynyń barysymen tanysty. Oqý orny 300 orynǵa eseptelgen, ony osy jyldyń sońyna deıin paıdalanýǵa berý josparlanýda. Nysan «Jaıly mektep» ulttyq jobasy aıasynda salynyp jatyr.

– Sapaly bilim elimizdiń árbir balasyna, ol úlken qalada nemese aýylda tursa da, qoljetimdi bolýy tıis. Aımaqtyq teńsizdikter birtindep joıylýda. Sondyqtan depýtattar «Jaıly mektep» jobasynyń júzege asyrylýyn baqylaıdy. Búgin kezdesýler Shemonaıha qalasynda bastaldy, ári qaraı basqa aýdandarda da jalǵasady», – deıdi májilis depýtaty Ulyqbek Tumashınov.

Aıta ketý kerek, depýtattar Qazaqstan Respýblıkasy men Reseı Federatsııasynyń shekarasyndaǵy shekara baqylaý-ótkizý pýnktiniń jumysymen de tanysty. Halyq qalaýlylary qoldanystaǵy jabdyqtardy jańartý, áskerı qyzmetshilerdi qamtamasyz etýdi jaqsartý jáne ótkizý pýnktterin jańǵyrtý máselelerin baqylaýǵa aldy.