Shell, Enı, Total Qazaqstannyń jasyl energetıkasyna ınvestıtsııa quımaq

NUR-SULTAN. QazAqparat - Shell, Enı, Total Qazaqstannyń jasyl energetıka salasyna ınvestıtsııa quımaq. Bul týraly búgin Úkimet otyrysynda QR Energetıka mınıstri Qanat Bozymbaev aıtty, dep habarlaıdy QazAqparat tilshisi.

Mınıstrdiń aıtýynsha, óńirlerde jańartylatyn energııa kózderi nysandaryn ornalastyrǵan kezde resýrstyq áleýet jáne elektr qýatyna degen qajettilik eskeriledi. Sonymen qatar Biryńǵaı elektr energetıka júıesiniń aımaqtary boıynsha maksımaldy ruqsat etilgen qýat pen ınfraqurylym daıyndylyǵy da nazarǵa alynady. Bul Qazaqstannyń Biryńǵaı elektr energetıka júıesiniń senimdi jumys jasaýy úshin jańartylatyn energııa qýatynyń lımıtin asyrmaýǵa múmkindik beredi. Osyǵan baılanysty eń joǵary qýat búginde Almaty oblysynda, Jambyl oblysynda jáne Qaraǵandy oblysynda shoǵyrlanǵan

«Jasyl» energııa sektorynda qazir álemniń 10 elinen ınvestorlar jumys jasaıdy. Sondaı-aq Eýropa qaıta qurý jáne damý banki, Azııa damý banki, Azııa ınfraqurylymdyq ınvestıtsııalar banki, Qazaqstan damý banki sııaqty iri qarjy uıymdary da áriptestik baılanysta. Taǵy da bir jaǵymdy jańalyq, «jasyl» energııa sektoryna ınvestorlar retinde Shell, Enı, Total sııaqty iri munaı kompanııalary keldi. Olar Qazaqstanda jobany iske asyrý quqyǵyna baq synamaqshy«, - dedi mınıstr.

Osylaısha, onyń dereginshe, Qarjy-esep aıyrysý ortalyǵy jumysyn bastaǵan ýaqyttan beri jańartylatyn energııa sektoryna shamamen 406 mlrd teńge tartyldy. Salynǵan nysandar shamamen 81 mlrd teńge salyq tóleıtin bolady. Sondaı-aq nysandardy salý kezinde qazaqstandyq ınjenerler, qurylysshylar jáne qosalqy jumysshylar tartylady. Bul rette, 1 myńǵa jýyq turaqty «jasyl» jumys orny quryldy.

«Onyń kóbi Qazaqstannyń shalǵaı óńirlerindegi azamattardy jumyspen qamtyǵany qýantady», - dedi Qanat Bozymbaev.