Shekti ball jınaı almaǵandar qaıtadan UBT tapsyryp jatyr

ALMATY. QazAqparat – Tamyz UBT-sy bastaldy, ol 15-ine deıin jalǵasady. Testileýge qatysý úshin 17 myńnan astam ótinish qabyldandy, dep habarlaıdy QazAqparat Ǵylym jáne joǵary bilim mınıstrliginiń baspasóz qyzmetine silteme jasap.

UBT-ǵa qatysýshylardyń 66%-ǵa jýyǵy qazaq tilinde, 34%-y orys tilinde, 53 adam aǵylshyn tilinde test tapsyrýǵa nıet bildirdi. Alǵashqy kúni, ıaǵnı 10 tamyzda 4 499 adam emtıhan tapsyrady.

Tamyzdaǵy UBT belgilengen shekti ball jınaı almaǵan, beıindi pánder kombınatsııasy sáıkes kelmeıtin UBT nátıjeleri bar, UBT nátıjeleri joıylǵan talapkerlerdiń testileýden qaıta ótip, JOO-ǵa aqyly negizde túsý múmkindigi bolýy úshin ótkiziledi. Tirkelý kezinde testilenýshiler emtıhan ótkiziletin oryndy, kúndi jáne ýaqytty ózderi tańdady.

Talapkerler testileý aıaqtalǵannan keıin 30 mınýt ishinde apellıatsııaǵa ótinish bere alady. Sertıfıkat apellıatsııa týraly sheshim qabyldanǵannan keıin testilenýshiniń jeke kabınetinde qoljetimdi bolady.

Esterińizge sala ketsek, tamyz aıynda ótetin UBT-ǵa tirkelý Ulttyq testileý ortalyǵynyń saıtynda app.testcenter.kz 20-30 shilde aralyǵynda júrgizildi.

JOO-da aqyly negizde óz mamandyǵy boıynsha oqýdy jalǵastyrýdy josparlap otyrǵan kolledj túlekteri oqýǵa áńgimelesý qorytyndysy boıynsha qabyldanady. Bul rette oqýǵa qabyldaýdy JOO-lardyń qabyldaý komıssııalary júzege asyrady.

Barlyq bes UBT qorytyndysy boıynsha belgilengen shekti ball jınaı almaǵan, testileý nátıjesi joıylǵan, beıindik pánder kombınatsııasy sáıkes kelmeıtin talapkerlerge JOO-ǵa shartty túrde aqyly negizde oqýǵa túsý múmkindigi beriledi. Aryqaraı olar 2024 jyly qańtar, naýryz, negizgi jáne tamyz UBT-syna qatysyp, JOO-da oqýyn jalǵastyrý úshin qajetti shekti balyn jınaı alady.