Shekarashylar ıtbalyq tólin qutqardy

NUR-SULTAN. QazAqparat – Bir aı buryn turǵyndar araldan taýyp alǵan ıtbalyq tóli tolyq emdelgennen keıin teńizge jiberildi, dep habarlaıdy QazAqparat.

Bul týraly Ulttyq qaýipsizdik komıtetiniń shekara qyzmeti habarlady.

29 naýryzda Baýtıno kentiniń turǵyndary qaýqarsyz qalǵan ıtbalyq tólin taýyp alǵan bolatyn. Aralda eki kún boıy qaraýsyz jatyp qalǵan jaýnardyń salmaǵy 4 keliden sál ǵana artyq bolyp shyǵady. Qalypty jaǵdaıda olardyń salmaǵy 10-12 keliniń arasynda bolýy kerek. Turǵyndardyń dabylyna Kaspıı ıtbalyǵyn zertteý jáne ońaltý ortalyǵynyń mamandary men UQK Shekara qyzmeti departamentiniń Jaǵalaý kúzeti dıvızıonynyń mamandary qulaq asyp, «Qalqan» motorly qaıyǵymen qutqarý operatsııasyna shyqqan edi.

Qutqarylǵan ıtbalyq tóli Aqtaý qalasyndaǵy Kaspıı ıtbalyǵyn zertteý jáne ońaltý ortalyǵynda bir aı boıy kútimde bolyp, qaıtadan teńizgen jiberildi.

Shekara qyzmeti departamentiniń mamandary «Bekire» operatsııasy sheńberinde tek bir táýlik ishinde brakoner aýynan 6 ıtbalyq pen kóp mólsherdegi bekire tuqymdas balyq qutqarylǵanyn aıtady.

«Brakonerler ıtbalyqtardy qara bazarda satý úshin ustaıdy. 100 gramm maıy 5000 teńge turady. Biraq Ortalyq Azııa ekologııalyq zertteýler ınstıtýty ǵalymdary Kaspıı ıtbalyǵy maıynyń emdik qasıetteri joq ekenin, tipti adam densaýlyǵyna qaýip tóndiretinin dáleldegen. Itbalyqtar Kaspıı teńiziniń ekojúıesinde erekshe oryn alady. Sondyqtan Shekara qyzmeti barshańyzdy qorshaǵan ortaǵa uqypty qaraýǵa shaqyrady», - dep jazylǵan departamenttiń resmı aqparatynda.