Shekarashylar bes kúnge sozylǵan ekstremızmge qarsy oqý-jattyǵý ótkizdi (FOTO)
Qazirgi tańda ekstremızm men terrorızm máselesi ýshyǵyp turǵandyǵy belgili, bul másele ulttyq qaýipsizdikke de qaýip-qater tóndirýde.
«22 shildede Qurlyqtaǵy áskerlerdiń Áskerı ınstıtýtynda bes kúnge sozylǵan oqý-jattyǵýdyń eń bir belsendi bóligi ótkizildi. Oǵan Shekara qyzmetiniń barlyq bólimsheleri, onyń ishinde shekara avıatsııasy, kemeleri men katerleri, túrli áskerı tehnıkalary qatystyryldy», delingen habarlamada.
Eki óńirlik shekara basqarmalarynyń túıisken jerinde shekara saqshylary shekaralyq is-sharalardy ótkizýdi is júzinde atqardy. Birqatar mindetterdi shekarashylar Qazaqstan Respýblıkasynyń Ulttyq ulany jáne Qarýly kúshter qurylymdarymen birlese otyryp atqardy.
Qazaqstandyq shekarashylar áskerı jáne jedel-qyzmettik daıyndyqtaryn, uıymdyq-basqarýshylyq qyzmetti atqara alatyndyqtaryn, qarýly qaqtyǵys kezinde kúsh quraldaryn qoldaný barysyn tekserdi.
Shtab jáne Memlekettik shekarany kúzetýge qatysy bar basqa da basqarý organdarynyń yqpaldastyǵyn damytý isin pysyqtady.
Shekara qurylymdaryndaǵy laýazymdy tulǵalar úshin ózderiniń fýnktsıonaldyq mindetterin ártúrli baǵytta pysyqtaýǵa berilgen jaqsy múmkindik ekendigin aıta ketý kerek.
«Batys-2016» kópsatyly jedel-taktıkalyq komandalyq-shtabtyq oqý-jattyǵýy úsh deńgeıde ótkizildi.
Onyń birinshi deńgeıinde - Qazaqstan Respýblıkasynyń ońtústik batysyndaǵy memlekettik shekaradaǵy shekaralyq qarýly qaqtyǵystyń shartty túrde bastalýyna qatysty is-qımyldar pysyqtaldy.
Oqý - jattyǵýdyń ekinshi deńgeıinde dıversııalyq - barlaý, bandıttik toptardy izdestirý, olardy ustaý sharalary pysyqtaldy. Sondaı-aq qarýly qaqtyǵys kezinde kórshiles elderden ótýi múmkin bosqyndardy aýyzdyqtaý máselesin retteý is júzinde kórsetildi.
Oqý-jattyǵýdyń úshinshi deńgeıinde shekaralyq qarýly qaqtyǵysty joıýǵa qatysty áskerı atys praktıka júzinde kórsetildi.
Shartty qarsylas retinde kórshiles eldiń aýmaǵy alyndy. Kórshiles eldiń úkimettik áskerleri men halyq jasaǵy qarsylastardyń jasaǵyn toqtatyp, ózderiniń aýmaǵynyń kóp bóligine baqylaý ornatty.
Kishkene úzilisten keıin shartty qarsylas áskerı jáne arnaýly is-sharalardyń nátıjesinde shekaralas aımaqty basyp aldy. Memlekettik shekara jolaǵyndaǵy jaýapkershilikti kúsheıtý týraly sheshim qabyldandy.
Shekara qyzmetiniń birlestikteri, qurlymdary jáne bólimderi memlekettik shekarany kúzetýdiń kúsheıtilgen rejımine kóshiriledi. Jedel túrde Shekara qyzmetiniń rezerv toby jasaqtalady. Olar beligilengen aýdandarda qurylyp, sol jerlerdegi óńirlik basqarmalardyń qaramaǵyna beriledi. Olardy ornalastyrý jáne áskerı is-áreketke engizý is-sharalary qarastyrylady. Teńizdegi shekaramyzdy kúsheıtý úshin kemeler sapynan eki taktıkalyq top jasaqtalyp, olar tikushaqtar zvenosymen kúsheıtiledi.
Jaǵdaı óte ýshyqqan jaǵdaıda ulttyq qaýipsizdikti saqtaý úshin aýmaqtyq bólimshelerde daıyndyq is-sharalary atqaryla bastaıdy.
Shoǵyrlaný aýmaǵyna jınaqy toptar, taktıkalyq keme toptary kele bastaıdy, sýasty dıversııalyq jáne mınaǵa qarsy is-sharalar júrgiziledi. Aldyńǵy sheptegi basqarý beketteri, avıatsııa toptary qurylady.
Shekara zastavalarynyń kúsh-qurylymdarynyń arqasynda shekara otrıadtarynyń kúsh-qurylymdaryn qatystyra otyryp ınjenerlik jabdyqtaý úshin is-sharalar atqaryla bastaıdy.
Shabýyl kezinde qarsylastyń negizgi kúshteri aıtarlyqtaı shyǵynǵa batty. Sodyrlar jasaqtarynyń birqatar bóligi kórshiles memleketterdiń biriniń aýmaǵynda qaıtadan jasaqtana bastady. Áskerı is-qımyldar júrgizile bastaıdy.
Jaǵdaı shyn máninde ýshyǵa tústi. Shekara zastavalarynyń aýmaǵynda Memlekettik shekarany buzǵan azamattar shuǵyl túrde kóbeıe tústi.
Shekara zastavasyndaǵy jaǵdaıdyń ýshyǵýy múmkin ekendigin esepke ala otyryp zastavalar adam sanymen, jáne borndytehnıkalarmen kúsheıtildi.
Memlekettik shekara toptyq qarýmen qarýlanǵan shekara narıadtarymen kúsheıtiledi, al qaýip-qater tónip turǵan aýmaqtar brondytehnıkamen kúsheıtiledi. Memlekettik shekarada belgilengen rejımdi buzýshylardyń jolyn kesý baǵytyndaǵy is-sharalar atqarylady.
Teńiz arqyly ótetin memlekettik shekara boıynda da shekaralyq ıntsıdentter kóbeıe túsedi - qurlyqtaǵy jáne teńizdegi memlekettik shekaranyń buzylýy, jekelegen adamdardyń jáne toptanǵan adamdardyń shekara buzýy baıqalady, kórshiles memleketten baqylaýdyń júrgizilip jatqan deregi tirkeledi, shekara narıadtaryn atý deregi tirkeledi. Bosqyndardyń turaqty túrde kelýi baıqalady.
Osylaısha bosqyndardyń sany arta túsedi. Olar shekara boıyna lager turǵyzady. Qarsylastar ózderiniń jymysqy pıǵyldaryn iske asyrý úshin bosqyn retinde enip, sodan keıin úgit-nasıhattyq, búldirýshilik, jansyzdardy iske tartý áreketin iske asyrady. Osy maqsatta qarsylastar bosqyndar lagerinde búldirýshilik áreketin belsendi túrde júrgize bastaıdy, sol arqyly shekaradan jalpylaı ótýdi kózdeıdi.
Kórshiles bir memlekettiń aýmaǵynda qarýly qaqtyǵystyń oryn alǵandyǵy týraly aqparat kelip túsedi, ol qaqtyǵystyń bizdiń eldiń aýmaǵyna qaraı oıysýy múmkin ekendigi qarastyralady.
Memlekettik shekarany buzyp ótkender tirkeledi. Shekara zastavalary shekarany buzyp ótýshilerdi toqtatý jolynda áskerı is qımylǵa kirisedi.
Quramaly áskerı jasaqtardyń kómegimen áskerı avıatsııany qoldana otyryp zańsyz ótken qarýly jasaqty joıý týraly sheshim qabyldanady.
Qurama otrıad jasaqtary belgilengen aýdanǵa qaraı marshpen qozǵalady, avıtsııanyń kómegi arqasynda urysqa kirisedi. Utymdy shabýyl nátıjesinde basyp kirgen qarsylastyń kózi joıylady, memlekettik shekarany qalpyna keltirý boıynsha is-sharalar atqarylady.
Shekara qurylymdary shekarany kúzetýdiń qalyptaǵy jaǵdaıyna kóshiriledi, turaqty qyzmet etetin jerleri boıynsha rezervtik toptar qaıta jasaqtalady.
Shekara saqshylary osylaısha ózderine júktelegen mindetterdi abyroımen oryndap shyqty, terrorızmge, esirtki men qarý-jaraqtyń zańsyz aınalymyna, tabıǵı baılyqty kontrabandalyq jolmen alyp ketýge, zańsyz mıgratsııaǵa tosqaýyl qoıyldy.
Elimizdiń ulttyq qaýipsizdigin qamtamasyz etý baǵytynda terrorızmge qarsy kúres qashanda basymdyqqa ıe ekendigi belgili.
Búgingi shekarashy degenimiz ol - óz Otanynyń patrıoty, bedeldi de abyroıly, tereń bilim ıgergen, adamgershilik qasıeti joǵary, kez-kelgen sátte qınalǵan janǵa kómek qolyn sozýǵa daıyn, eli men jerin qasyq qany qany qalǵansha qorǵaı biletin maman ekendigi anyq, ony búgingi oqý-jattyǵý barysynda dáleledeı bildi.