Shekarany kúzetýdiń jańa tehnıkalyq quraldary synaqtan ótip jatyr - Erlan Aldajumanov

ASTANA. QazAqparat – Shekarany kúzetýdiń jańa tehnıkalyq keshenderi quryldy. Bul týraly elordada Búkilarmııalyq keńestiń otyrysynda QR UQK Tóraǵasynyń orynbasary – Shekara qyzmetiniń dırektory, general-maıor Erlan Aldajumanov aıtty, dep habarlaıdy QazAqparat tilshisi.

«Belsendi is-qımyl baǵytynda shekara ýchaskelerin ınjenerlik jabdyqtaý jalǵasyp keledi. Sonymen qatar, shekarany kúzetýdiń jańa tehnıkalyq quraldary, zamanaýı qarý-jaraq pen tehnıka úlgileri synaqtan ótip jatyr. Shalǵaıda ornalasqan jerlerde pılotsyz ushý apparattary jáne mobıldik beınebaqylaý kesheni qoldanylyp jatyr. Keıbir ýchaskelerde termovıdeo men beınebaqylaý jabdyqtaryn qoldana otyryp, shekaranyń uzyn ýchaskelerin kúzetýdiń tehnıkalyq keshenderi qurylǵan», - dedi E. Aldajumanov.

Onyń aıtýynsha, 2020 jyldan bastap shekarany kúzetýde arnaıy maqsattaǵy bólimsheler quryldy.

Budan buryn habarlanǵandaı, Memleket basshysy Qasym-Jomart Toqaevtyń qatysýymen ótetin Búkilarmııalyq keńestiń otyrysy bastaldy.

Qorǵanys mınıstri Rýslan Jaqsylyqov 250 áskerı qyzmetshi Afrıkadaǵy mıssııaǵa daıyndalyp jatqanyn aıtty.