Shekaralyq ótkizý pýnkterinde qazir ahýal qandaı - UQK málimdemesi

ASTANA. QazAqparat – Bıyl tamyzda shekara qyzmeti shekaradaǵy, onyń ishinde ótkizý pýnkterindegi zańsyz qyzmetke qarsy is-sharalar ótkizdi. Kólikter tehnıkalyq qaraý quraldarymen jáne qyzmettik ıttermen tekserildi, dep habarlaıdy QazAqparat QR UQK baspasóz qyzmetine silteme jasap.

Ótkizilgen is-sharalar barysynda esirtki quraldaryn tasymaldaýdyń – 35, qarý-jaraq pen oq-dári ótkizýdiń – 33, jalǵan qujat jasaýdyń – 20, qos azamattyqtyń – 36 faktisi tirkeldi. Jalpy somasy 2 mlrd teńge bolatyn 299 kontrabandanyń joly kesilip, 27 ret jalǵan qujatpen avtokólikti kirgizip-shyǵarmaq bolǵandar anyqtaldy. Kóshi-qon zańnamasyn buzǵan 909 adam ákimshilik jaýapqa tartyldy. 28 tamyzdaǵy jaǵdaı boıynsha, barlyq ótkizý pýnkteri qalypty rejımde jumys istep tur.

Qazaq-qyrǵyz shekarasyndaǵy «Qarasý» (Qazaqstan) - «Aq tilek» (Qyrǵyzstan) ótkizý pýnkti arqyly keshegi táýlikte Qazaqstan aýmaǵyna 350-den astam avtokólik kirdi. 80-100 avtokólik kezekte tur. Bul - osy maýsymdaǵy qalypty jaǵdaı. Qazaq-qyrǵyz shekarasynyń basqa avtokólik ótkizý pýnkterinde kezek joq.Sonymen qatar, Ózbekstanmen shekaradaǵy «Jibek joly», «Jetisaı», «B. Qonysbaev atyndaǵy» jáne «Qazyǵurt» ótkizý pýnkterinde qaıta qurylymdaýǵa baılanysty kólikter kezekke turyp, jınalyp qalǵan.Reseımen shekaraǵa keler bolsaq, «Syrym», «Jaısan» jáne «Qaıraq» pýnkteriniń aldynda únemi kólikter jınalyp qalady. Bul da - osy maýsym úshin qalypty jaǵdaı. Sondaı-aq, shekaradaǵy ótkizý pýnkterinde qandaı da bir qosymsha shekteý sharalary engizilgen joq.