Shekaradan zańsyz ótkender Zaısan qalasyna jetkiziledi

NUR-SULTAN. QazAqparat - 10 qazanda Qytaı azamattary Murager Álimuly men Qaster Musaqanǵa qatysty QR Qylmystyq kodekstiń 392-baby 1-bóliginde qarastyrylǵan «Qazaqstan Respýblıkasynyń Memlekettik shekarasyn qasaqana zańsyz ótý» boıynsha sotqa deıingi tekserý bastaldy, dep habarlaıdy QazAqparat QR UQK ShQ baspasóz qyzmetine silteme jasap.

«Olar 14 qazanda Almaty qalasyndaǵy Shekara qyzmetiniń «Shyǵys» óńirlik basqarmasyna shekaradan ótý jaǵdaıyn anyqtaý úshin shaqyrtylǵan bolatyn. Protsestik tártippen ustalǵan joq, qamaý sharalary da qoldanylmaǵan. M. Álimuly men Q. Musaqan «Shyǵys» ÓB ǵımaratynda óz erikterimen qaldy jáne olarǵa tamaq, jatatyn oryn berildi», delingen habarlamada.

Vedmostvonyń málimetinshe, olar 1 qazanda QHR-dan QR-ǵa shekaradan zańsyz ótkenderi týraly aldyn ala aıtqan.

«Osyǵan baılanysty, shekaradan ótý jaǵdaıyn anyqtaý, sondaı-aq boljamdy quqyq buzǵan jerde protsestik jáne basqa da tekserý is-áreketterin ótkizý úshin 15 qazanda olardy Shyǵys Qazaqstan oblysynyń Zaısan qalasyna jetkizý josparlanyp otyr. Sonymen qatar, Q. Musaqan 2006 jylǵy 21 maýsymda mal urlyǵy úshin qylmystyq jaýapkershilikten jaltarý maqsatynda Qazaqstan-Qytaı shekarasyn buzǵandyǵy belgili boldy. Ol kezde tekserý jumystarynan keıin QHR-ǵa qaıtarylǵan bolatyn», delingen habarlamada.

Shekara qyzmeti istiń qoldanystaǵy zańnamaǵa sáıkes júrgizilip jatqanyn málimdeıdi.

«UQK Shekara qyzmeti QHR azamattary M. Álimuly men Q. Musaqanǵa qatysty sotqa deıingi tekserý, olardyń quqyqtarynyń tolyq saqtalýymen, sondaı-aq halyqaralyq mindettemelerge jáne Qazaqstan Respýblıkasynyń qoldanystaǵy zańnamalaryna sáıkes júrgizilip jatqanyn habarlaıdy», delingen habarlamada.