Shekaradan ótý kezinde taýar qunyn jalǵan kórsetkenderden 38 mlrd teńge óndirildi

ASTANA. QazAqparat – Jyl basynan beri shekara pýnktilerinen ótkizý kezinde taýardyń qunyn naryqtaǵy baǵadan artyq etip kórsetkender anyqtalyp, olardan qosymsha 38 mlrd teńge kedendik tólem men salyq óndirildi. Bul týraly Ortalyq kommýnıkatsııalar qyzmetindegi brıfıngide Memlekettik kirister komıteti tóraǵasynyń orynbasary Baqytjan Slıamov aıtty, dep habarlaıdy QazAqparat tilshisi.

«Bıylǵy jyly taýarlardyń EAEO kedendik shekarasy arqyly ótýin baqylaýdy bir jerde biriktirý jáne Ahýaldyq ortalyq pen Elektrondy deklaratsııalaý ortalyǵynyń bazasynda Bas dıspetcherlik basqarma quryldy.

Ahýaldyq ortalyq – naqty ýaqyt rejıminde pýnktilerdegi taýarlardyń rentgen-sýretterin taldaýdy jáne kedendik jete tekserýler júrgizý protsesin súıemeldeýdi júzege asyrady.

Al, Elektrondy deklaratsııalaý ortalyǵy – taýarlar shyǵarylǵanǵa deıin taýarlardyń qunyn baqylaýdy, jeńildikter men preferentsııalardy qoldanýdyń negizdiligin jáne baqylaý aıaqtalǵannan keıin kedendik deklaratsııalardy shyǵarýdy júzege asyrady.

Jalpy, jyl basynan beri Ahýaldyq ortalyq 4,5 myń zań buzýshylyqty anyqtady. 15,5 mlrd teńge somasynda kedendik tólemder óndirildi. Kedendik tekserýlerdiń tıimdiligi 2 esege artty.

Elektrondy deklaratsııalaý ortalyǵy qurylǵan sátten bastap qosymsha 38 mlrd teńge somasynda kedendik tólemder men salyqtar óndirildi», - dep toqtaldy Baqytjan Slıamov.

Budan ózge, komıtet tóraǵasynyń orynbasary búginnen bastap Qytaımen shekaradaǵy «Dostyq» avtomobıl ótkizý pýnktinde elektrondy kezek júıesi iske qosylatynyn atap ótti.

Foto: ria.ru