Shekaradan aǵylǵan bosqyndar nópirin retteý qaǵıdalary jarııalandy

ASTANA. QazAqparat – Eńbek jáne halyqty áleýmettik qorǵaý mınıstrligi pana izdegen adamdardyń jappaı aǵyny kezinde ýaqytsha qonystaný pýnktilerin aıqyndaý, qabyldaý jáne ornalastyrý qaǵıdalary týraly Úkimet qaýlysynyń jobasyn jarııalady, dep habarlaıdy QazAqparat tilshisi.

Bul qujat áleýmettik sıpattaǵy tótenshe jaǵdaı kezinde Qazaqstan shekarasyna aǵylǵan sheteldikterdi qarsy alýdyń tártibin bekitýge arnalǵan.

Bosqyn mártebesin alyp úlgermegen mundaı sheteldikterge pana izdeýshi degen termın qoldanylmaq.

Qaýly jobasynda «Pana izdegen adam – jergilikti atqarýshy organ bosqyn mártebesin berý týraly ótinishhaty boıynsha túpkilikti sheshim qabyldaǵanǵa deıin Qazaqstan Respýblıkasynda pana izdeýge nıet bildirgen sheteldik nemese azamattyǵy joq adam», - degen anyqtama berilgen.

Al pana izdegen adamdardyń jappaı aǵylýyn tirkeý úshin bir mezette shekaraǵa kelgen mundaı azamattardyń sany 100-den asý kerek.

Іrgeles memleketterdiń aýmaqtarynan memlekettik shekara arqyly pana izdegen adamdardyń jappaı kóshýi tirkelse, jergilikti aýmaqtaǵy nemese respýblıka boıynsha áleýmettik sıpattaǵy tótenshe jaǵdaı jarııalanady. Ondaı rejımdi QR Prezıdenti tıisti Jarlyqpen QR Parlamentin dereý habardar ete otyryp, QR Premer-Mınıstrimen jáne Parlamenti palatalarynyń tóraǵalarymen resmı konsýltatsııalardan keıin engizedi.

«Respýblıkalyq jáne óńirlik jedel shtabtardyń sheshimderin oryndaý mindetti», - delingen qaýly jobasynda.

Pana izdeýshilerdiń ýaqytsha qonytanatyn ornyn jedel shtabtar aıqyndaıdy.

Sondaı-aq, qujatta Qazaqstannyń búkil aýmaǵynda engiziletin tótenshe jaǵdaıdyń qoldanylý merzimi 30 táýlikten, al onyń jekelegen jerlerinde engiziletin tótenshe jaǵdaıdyń qoldanylý merzimi 60 táýlikten aspaýǵa tıis ekeni de aıtylǵan.

Tótenshe jaǵdaıdy engizýge negiz bolǵan mán-jaılar joıylmaǵan kezde QR Prezıdenti onyń qoldanysyn merzimder sheginde uzartýǵa quqyly.

«Tekserý pýnktteriniń, shatyrly jáne statsıonarlyq lagerlerdiń oryndary úshin bastapqy tirshilikti qamtamasyz etýge daıyndalǵan tıisti qurylymy bar ártúrli ǵımarattar men qurylystar (sanatorııler, demalys úıleri, pansıonattar, balabaqshalar, mektepter, ınternattar jáne t.b.) paıdalanylýy múmkin.

Pana izdegen adamdardy birinshi kezekte tirshilikpen qamtamasyz etý úshin qolda bar jabdyqtardyń sany jetkiliksiz bolǵan jaǵdaıda qyzmettik-turmystyq úı-jaılardy, klýbtardy paıdalanýǵa bolady», - delingen qujatta.

Ondaı oryndardy qarjylandyrý úkimettiń rezervinen iske asady.

«Jedel shtabtyń sheshiminde kózdelgen jaǵdaılardy qospaǵanda, pana izdegen, ýaqytsha ornalastyrý oryndaryndaǵy adamdar atalǵan aýmaqtan shyǵa almaıdy. Qajet bolǵan jaǵdaıda bosqyndar máseleleri jónindegi ýákiletti organnyń halyqaralyq uıymdarǵa pana izdegen adamdarǵa járdem kórsetý jóninde suraý salýǵa quqyǵy bar», - dep jazylǵan qaýly jobasynda.