Shekaradaǵy keptelis: Qyrǵyz júrgizýshileri koronavırýs testiniń nátıjesin uzaq kútýge májbúr

NUR-SULTAN. QazAqparat - Qyrǵyzstanmen shekaradaǵy hronometraj memlekettik kiris organdary tarapynan kidirtýdiń joq ekenin kórsetti, dep habarlaıdy QazAqparat Memlekettik kirister komıtetine silteme jasap.

Eske sala keteıik, biz buǵan deıin qazaq-qyrǵyz shekarasynda uzyn-sonar kólik kezegi qalyptasqanyn jazǵan bolatynbyz. Komıtet buǵan jemis-kókónis ónimderi maýsymynyń bastalýy, QHR-men saýda-sattyqty jańartý jáne COVID-19 ınfektsııasyna baılanysty 5 ótkizý pýnktiniń jumys istemeı turǵany sebep boldy dep túsindirgen.

Hronometraj barysynda «Qarasý» (20-22 mınýt jumsaldy) jáne «Aqtilek avtojol» (13-15 mınýt) beketterinde bir avtokóliktiń ótý ýaqytyn eki tarap - Qazaqstan Respýblıkasy men Qyzǵyzstan Respýblıkasy rastady.

3 maýsymda «Qarasý» jáne «Aqtilek avtojol» beketterinde Qazaqstan men Qyrǵyzstan ókilderiniń jumys kezdesýi ótti. Hronometraj eki ótkizý pýnktinen ótý kezinde QR-da salyqtyq baqylaý úshin qujattardy skanerleý 3 mınýtty alatynyn kórsetti, buny ekijaqty qol qoıylǵan Hronometraj hattamasy rastaıdy.

«Sonymen birge, «Aqtilek avtojol» pýnktinde hronometraj kezinde qyrǵyz dárigerleri júrgizýshilerden COVID-19-ǵa synama alǵan, alaıda testileý nátıjesin bermeı shyǵarǵan. Júrgizýshilerdiń aıtýynsha, hronometraj júrgizilgenge deıin olardy testileý nátıjesin kútýge májbúrlegen, ol óz kezeginde 30-40 mınýt ýaqyt alǵan. Olardyń sózin Qyrǵyzstan Respýblıkasy ekonomıka mınıstriniń orynbasary Eldar Álisherov rastady »dep málim etti komıtet.

Budan basqa, qyrǵyz jaǵyndaǵy qarsy jolaqpen kezekten tys ótý qyzmetin usynatyn «ótkizip jiberýshiler» áreketine Qyrǵyzstan júrgizýshileri narazylyq bildirip otyr.

Osy fakti boıynsha qyrǵyz tarapy óz ustanymyn bildirmedi.