Shekarada turyp qalǵan poıyzdar: «Qazaqstan temir joly» eksporttaýshylarmen kezdesti

NUR-SULTAN. QazAqparat - «QTJ» UK» AQ júk qozǵalysy jónindegi basqarma tóraǵasy orynbasarynyń mindetin atqarýshy Oralhan Qýlakovtyń tóraǵalyǵymen Qazaqstan-Qytaı shekarasynda uzaq ýaqyt boıy júgi turyp qalǵan otandyq eksporttaýshylarmen ZOOM-konferentsııa bolyp ótti, dep habarlaıdy QazAqparat.

Bıylǵy tamyz aıynyń ortasynan bastap QHR Alashańqaı stantsııasy qyzmetkerleri arasynda Covid-19 aýrýynyń jańa jaǵdaılary anyqtalǵannan keıin poıyzdardy qabyldaýdy táýligine 18-den 7-8 quramǵa deıin tómendetti.

Qytaı jaǵy tek konteınerlik poıyzdardy shekteýsiz qabyldaıdy.

Sonymen qatar, Qytaı stantsııasynda jóndeý jumysy júrip jatyr. Bul poıyzdardy qabyldaý men ótkizýdi azaıtyp otyr.

Saldarynan júkter búlinip, qazaqstandyq eksporttaýshylar shyǵynǵa ushyrap, qozǵalystan qalǵan poıyzdar sany ósip otyr.

26 qyrkúıektegi jaǵdaı boıynsha Dostyq stantsııasy baǵytynda 106 poıyz nemese 5 300 vagon jolda turyp qalǵan.

Bul rette qazaqstandyq temirjolshylar QHR-dan poıyzdardy belgilengen merzimde jáne kólemde qabyldaýda.

«QHR júk kólemi josparyn shektemeýge kelisedi, biraq is júzinde júk tek konteınerlerde qabyldanady. Astyq tasyǵyshtarda jáne jabyq vagondarda astyq júkteriniń turyp qalýy jaǵdaıy erekshe alańdaýshylyq týǵyzady. Biz túrli vedomstvolarǵa júgindik. Alaıda tehnologııalyq protsess keshiktirilip jatyr», - dedi Oralhan Kýlakov.

Konferentsııa barysynda «QTJ» UK» AQ eksporttaýshylarǵa júkterdi konteınerlerge belsendi tıeýdi, júkti Dostyq stantsııasynan Altynkól–Qorǵas shekara ótkeline qaıta baǵdarlaýdy, basqa baǵyttarǵa baǵyttaýdy usyndy.

Temirjolshylar sondaı-aq, máseleni birlesip sheshý úshin bızneske qytaılyq alýshylarmen júk tasymaldaý máselelerin qatarlasa pysyqtaý qajet ekenin túsindirdi.

Óz kezeginde júk jóneltýshiler óz máseleleri týraly aıtyp, tyńdaıtyn jerine jetkizdi.

Atap aıtqanda, eksporttaýshylar QHR shekarasynda vagondardyń turyp qalýyna baılanysty aıyppul sanktsııalary salynýy múmkindigi týraly suraqtaryn qoıdy.

Oralhan Kýlakov júk jóneltýshi problemamen jalǵyzdan jalǵyz qalmaıtynyna sendirdi: «Sizdermen birge biz QHR júkterdi qabyldamaǵanyn, sondyqtan da vagondar turyp qalýda ekendigin dáleldeımiz jáne rastaımyz».

Konferentsııa uıymdastyrýshylary sendirgendeı, eksporttaýshylar máselesi temir jol basshylyǵynyń erekshe baqylaýynda.

Kezdesý sońynda júk jóneltýshiler ár seısenbi saıyn «QTJ» UK» AQ alańynda dástúrli qytaılyq temirjolshylarmen beınekonferentsbaılanys formatyndaǵy ótetin keńeske qatysýǵa shaqyryldy.