Shekara mańyndaǵy aýyl turǵyndaryna jer ýchaskesi óteýsiz negizde berilmek

ASTANA. QazAqparat – Indýstrııalyq-ınnovatsııalyq damý salasyndaǵy ýákiletti organ «Otbasy bankimen» birlesip, eldiń shekaralas aýdandarynda turǵyn úıge qoljetimdilikti arttyrý boıynsha jańa jobalardy ázirleıdi. Bul týraly Ulttyq ekonomıka mınıstrligi ashyq talqyǵa shyǵarǵan Aýyldardy damytýdyń 2023-2027 jyldarǵa arnalǵan tujyrymdama-jobasynda jazylǵan, dep habarlaıdy QazAqparat tilshisi.

«Shekara mańyndaǵy aýyldarda turaqty turatyn halyqty turǵyn úımen qamtamasyz etý maqsatynda óz qyzmetkerleri úshin turǵyn úı salǵan jumys berýshilerdiń shyǵyndaryn sýbsıdııalaý tetigi engiziledi. Sondaı-aq jeke turǵyn úı qurylysyna arnalǵan ıgerilmegen jańa jer ýchaskelerine ınjenerlik-kommýnıkatsııalyq ınfraqurylymdy júrgizý jónindegi jumys jalǵasady. Indýstrııalyq-ınnovatsııalyq damý salasyndaǵy ýákiletti organ «Otbasy banki» turǵyn úı qurylys jınaq banki» AQ-men birlesip, eldiń shekaralas aýdandarynda turǵyn úıdiń qoljetimdiligin arttyrý jónindegi jańa jobalardy ázirleıdi», - delingen Ashyq NQA portalynda jarııalanǵan tujyrymdamada.

Sonymen qatar kóshi-qon aǵynyn azaıtý maqsatynda eldi mekenderge eńbek mıgranttaryn tartý jumysy júrgizilmek.

«Eńbek mıgranttaryn tartý maqsatynda eńbek tapshylyǵy bar óńirlerdiń shekaralas eldi mekenderinde jer ýchaskelerin keıinnen menshikke bere otyryp, olardy óteýsiz paıdalanýǵa berý múmkindigi qaralatyn bolady», - dep jazylǵan kópshilik talqylaýǵa shyǵarylǵan qujatta.

Qosa ketsek, shekara mańyndaǵy klımaty qatal aýyl turǵyndarynyń 1 jyldyq eńbek ótili 1,5 jyl bolyp eseptelmek.

Budan bólek, tabıǵı-klımattyq jaǵdaıy kúrdeli shekara mańyndaǵy eldi mekender úshin elektr energııasyna tómendetilgen tarıf belgilenedi.