Shekara mańyna jurtshylyqty ońtaıly qonystandyrý - ulttyq qaýipsizdik úshin de úlken ról atqarady - Ǵ. Qasymov

ASTANA. Jeltoqsannyń 8-i. QazAqparat /Qanat Mámetqazyuly/ - Búgin QR Parlamenti Senatynyń Halyqaralyq qatynastar, qorǵanys jáne qaýipsizdik komıtetiniń otyrysyndaǵy «QR keıbir zańnamalyq aktilerine terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn talqylaý barysynda senator Ǵanı Qasymov osylaı málim etti,

 dep habarlaıdy QazAqparat.

«Qazaqstanda Keden odaǵy júzege asa bastaǵan soń, Reseımen aradaǵy kedendik beketter de birtindep joıyla bastaıdy. Endeshe, sol shekara mańynda kimder qalady, degen másele búgingi kúnniń birinshi mindeti bolýy tıis. Bul úshin Reseımen aradaǵy shekara mańyn jandandyrý, sol óńirlerdi jurtty qonystandyrý arqyly ıgerý kerek. Bos qalatyn kedendik-shekaralyq beketterdiń ornyna jurtshylyqty shoǵyrlandyryp, onda eldi mekender turǵyzylýy shart. Halyq shekara mańynda jer jyrtyp, ómir súrýge kirisip ketýi qajet. Óıtkeni, kez- kelgen memleketti alyp qarasańyz, olar shekara mańyna jurtty qonystandyrý máselesin birinshi kezekte júzege asyrady. Al bizde kerisinshe Shymkent, Almaty, Astana óńirlerine halyq tyǵyzdalyp jatsa, shekara mańynda jurtshylyqqa túk te jaǵdaı jasalmaǵan», dedi Ǵ. Qasymov.

Senatordyń aıtýynsha, shekara mańyn taqyrlamaı, jurtshylyqty ońtaıly qonystandyrý memleket qaýipsizdigi úshin de úlken ról atqarady. «Burynǵy Keńes odaǵynda da shekara aımaǵynda elderdi jaıǵastyryp, qonystaný úshin jaǵdaı jasalyp, bundaı jerlerdi ıgerýge kóp nazar aýdaryp kelgen bolatyn. Ondaı tájirıbeni qaıta engizgenniń mańyzy zor», dedi Ǵ. Qasymov.