Shekara mańyndaǵy aýdandardyń turǵyndaryna qandaı jaǵdaı jasalady
«Jalpy, Úkimet shekara mańyndaǵy aýmaqtardy damytý boıynsha tıisti jumystardy eldiń barlyq salany damytýǵa baǵyttalǵan qoldanystaǵy baǵdarlamalyq qujattar aıasynda júzege asyryp jatyr. Memleket basshysynyń tapsyrmasyna sáıkes, aýyldyq aýmaqtardy damytýdyń 2023–2027 jyldarǵa arnalǵan tujyrymdamasyna shekara mańyndaǵy aýmaqtardy damytý boıynsha jekeleı bólimdi engizý bóliginde ózgerister men tolyqtyrýlar engizilip, iske asyrylyp jatyr. Osy qujattar aıasyndaǵy sharalar ekonomıkany, ınfraqurylymdy, týrızmdi, shekara mańyndaǵy saýdany damytý, jumys oryndaryn qurý, memlekettik shekarany kesip ótý oryndaryn retteý jáne basqa da máselelerdi sheshýge baǵyttalǵan. «Aýyl – El besigi» baǵdarlamasy aıasynda shekara mańyndaǵy aýyldarda áleýmettik jáne ınjenerlik ınfraqurylymdy damytýǵa erekshe kóńil bólinedi. Máselen, 2019–2023 jyldary densaýlyq saqtaý, bilim berý, mádenıet, sport, elektrmen, jylýmen, gazben, sýmen jabdyqtaý obektilerin jáne joldar salý, rekonstrýktsııalaý ári jóndeý boıynsha 1 795 joba iske asyryldy», - delingen mınıstrliktiń Kazinform agenttigine bergen jaýabynda.
Budan basqa, Turǵyn úı-kommýnaldyq ınfraqurylymdy damytýdyń 2023–2029 jyldarǵa arnalǵan tujyrymdamasynyń aıasynda shekara mańyndaǵy aýyldardyń turǵyndary úshin turǵyn úıler salý, «Aýyl amanaty» baǵdarlamasy sheńberinde shaǵyn kredıtter berý, «Qoljetimdi ınternet» ulttyq jobasy boıynsha elimizdiń 17 óńiriniń 3 010 eldi mekenine (onyń ishinde 71 shekara mańyndaǵy aýyldy eldi mekene, 44 myń adamdy qamtı otyryp) talshyqty-optıkalyq baılanys jelileri arqyly ınternettiń joǵary jyldamdyǵyn berý jumystary atqarylyp jatyr. Sýbsıdııalaý jónindegi joba aıasynda 1 123 eldi mekende (onyń ishinde 514 shekara mańyndaǵy aýyl) talshyqty-optıkalyq baılanys jelileri arqyly jergilikti jelilerdi salý eskerilgen. Sonymen qatar, Starlink júıesin paıdalana otyryp, shalǵaıdaǵy aýyl mektepterin qosý jónindegi pılottyq joba sheńberinde eldiń 1 993 mektebin (onyń ishinde 602 shekara mańyndaǵy aýyldardyń mektebi) qosý boıynsha jumystar atqarylyp jatyr.
«Qazirgi kezde QR Úkimetiniń 2015 jylǵy 31 jeltoqsandaǵy №1193 qaýlysyna sáıkes, aýyldy eldi mekenderdiń mamandaryna kólemi 25% ústemeaqy belgilengen. Budan basqa, múddeli memlekettik organdarmen tabıǵı-klımattyq jaǵdaılary kúrdeli shalǵaıdaǵy shekara mańyndaǵy aýdandardyń turǵyndary úshin jalaqyǵa ústemeaqyny, eńbek ótilin esepteýdiń erekshe normalaryn engizý máselesi pysyqtalyp jatyr», - dep atalyp ótken vedomstvo aqparatynda.