Shekara mańynda jumys isteıtinder aılyǵyna 50 paıyz ústemeaqy qosylýy múmkin

<p>ASTANA. KAZINFORM &ndash; Shekaradan 50 shaqyrym qashyqtyqta jatqan eldi mekenderde jumys isteıtin azamattardyń aılyǵyna 50 paıyz ústemaqy qosylyp, eńbek ótili ózgeshe eseptelýi múmkin. Ulttyq ekonomıka mınıstrligi Kazinform saýalyna osyndaı jaýap usyndy.</p>

- Halyqtyń kóshi-qon aǵynyn azaıtý jáne eńbegi artyq óńirlerden eńbek mıgranttaryn tartý maqsatynda eńbek tapshylyǵy bar oblystardyń shekaralas eldi mekenderinde jáne ekstremaldy tabıǵı-klımattyq jaǵdaılary bar (jylytý maýsymy 9 aıǵa sozylatyn) elimizdiń soltústik jáne shyǵys óńirleriniń jáne batys óńiriniń jekelegen aýdandarynda (Memlekettik shekaradan 50 km deıingi qashyqtyqta ornalasqan) shalǵaı shekara mańyndaǵy aýyldyq okrýgterdiń turǵyndary úshin ýákiletti memlekettik organdar jalaqysyna 50% deıin ústemeaqy qosý jáne eńbek ótilin esepteýdiń erekshe normalaryn júrgizý jáne t.b. máseleler pysyqtalyp jatyr, - dep jazylǵan resmı málimette.

Vedomstvonyń deregi boıynsha shekaradan 50 shaqyrym qashyqtyqta ornalasqan 1 300-ge jýyq eldi meken bar.

- Qazirgi ýaqytta elimizdiń 14 oblysy Reseı Federatsııasymen, Qytaı Halyq Respýblıkasymen, Ózbekstan, Qyrǵyzstan jáne Túrikmenstan aýmaqtarymen shektesedi.

Tikeleı shekara mańy beldeýinde memlekettik shekaradan 50 km deıingi qashyqtyqta 1,7 mln adam turatyn 1 283 shekara mańyndaǵy aýyldyq eldi meken ornalasqan, - delingen jaýapta.

Resmı málimetke súıensek, keıingi on jyldyń ishinde Qazaqstan kartasynan 572 aýyl joıylǵan. Aldaǵy 3 jylda olardyń qataryna taǵy 546 aýyl qosylýy múmkin.