Shegirtkege qarsy egistikterdi óńdeýge arnalǵan tehnıkanyń sany 2 ese artty

<p>ASTANA. KAZINFORM &ndash;&nbsp;Jerústi búrikkish tehnıkasy men UUA-ny (drondar) satyp alý jáne paıdalaný qoljetimdiligin arttyrý maqsatynda aýyl sharýashylyǵy óndirýshileri men hımııalyq óńdeý jónindegi qyzmetterdi usynýshylarǵa satyp alynǵan tehnıka qunynyń 25%-y óteledi.</p>

Úkimettiń baspasóz qyzmeti habarlaǵandaı, bul úshin Aýyl sharýashylyǵy mınıstrliginiń ınvestıtsııalyq sýbsıdııalaý erejelerine tıisti ózgerister engizildi.

Premer-mınıstrdiń orynbasary – ulttyq ekonomıka mınıstri Serik Jumanǵarınniń tóraǵalyǵymen Úkimette shegirtkege qarsy kúreske daıyndyq jáne kóktemgi dala jumystaryna ázirlik barysy týraly málimetter talqylandy.

Aýyl sharýashylyǵy vıtse-mınıstri Ermek Kenjehanulynyń aıtýynsha, 2024 jyly hımııalyq óńdeý úshin 247 birlik tehnıka paıdalanylǵan bolsa, 2025 jyly bul san 443-ke deıin ulǵaımaq. Onyń ishinde 46 agrodron bar, olardy Aýyl sharýashylyǵy mınıstrligi «Fıtosanıtarııa» RMK-nyń aımaqtyq bólimshelerine satyp alǵan. Sondaı-aq 7 zertteý UUA alynǵan.

- Túrkistan oblysynda ótken jyldyń kókteminde agrodrondar arqyly alqaptardy búrký jáne pestıtsıdterdi satyp alý, tasymaldaý, saqtaý jáne óńdeýdi qosa qamtıtyn ortalyqtandyrylǵan qyzmetti pılottyq túrde synaqtan ótkizý jobasynyń nátıjeleri boıynsha, Aýyl sharýashylyǵy mınıstrligi fıtosanıtarııalyq sharalardy barlyq óńirlerde «Bir jetkizýshi – barlyq jumystar» qaǵıdaty boıynsha uıymdastyrýdy engizdi. Bul bızneske atalǵan qyzmetterdi satyp alýǵa qatysýdy tartymdy etip, nátıjege jaýapkershilikti arttyrady. Budan bólek, biz fermerler men hımııalyq óńdeý qyzmetterin jetkizýshilerge agrodrondar, jerústi ventılıatorly jáne shtangaly búrikkishterdiń qunynyń 25%-yn óteý arqyly qolaıly jaǵdaı jasadyq, - dedi Ermek Kenjehanuly.

Sondaı-aq otyrysta aımaqtardyń kóktemgi dala jumystaryna daıyndyǵy qaraldy. 2024 jylǵy 29 qarashada bastalǵan erte qarjylandyrý aıasynda bólingen 100 mlrd teńgeniń 70 mlrd teńgesi 671 aýyl sharýashylyǵy óndirýshisine baǵyttaldy. Bul qarjyny eń belsendi paıdalanǵandar – dándi daqyldar egetin aımaqtar: Aqmola (15,4 mlrd teńge), Qostanaı (14,9 mlrd teńge) jáne Soltústik Qazaqstan oblystary (14,5 mlrd teńge). Al ońtústik aımaqtarda – Túrkistan, Jambyl jáne Jetisý oblystarynda, kóktemgi egis jumystary erterek bastalatyn aımaqtarda, ótinimder somasy nebary 10 mlrd teńge.

Aımaqtardyń aldyn ala málimeti boıynsha, respýblıkada kóktemgi dala jumystaryna aýyl sharýashylyǵy tehnıkasynyń daıyndyǵy qazirgi tańda shamamen 56%. 2024 jylǵy ónimge arnalǵan tuqymǵa degen qajettilik 2,3 mln tonna bolsa, onyń 99%-y daıyndalǵan.

Keńes qorytyndysy boıynsha Serik Jumanǵarın egistik alańdarynyń qurylymyn qaıta qaraýdy, atap aıtqanda, bıdaı egý alqaptaryn qysqartyp, maıly daqyldar men basqa da joǵary tıimdiligi bar daqyldardy kóbeıtýdi tapsyrdy. Sondaı-aq 2024 jylǵy ónimde eń joǵary nátıje kórsetken qazaqstandyq selektsııanyń elıtalyq tuqymdaryn egý alańdaryn barynsha ulǵaıtý qajettigin aıtty.

Kelesi sársenbide Serik Jumanǵarın kóktemgi egis jumystaryna daıyndyq barysymen tanysý jáne ekonomıkanyń naqty sektorynyń damýyn talqylaý úshin ońtústik óńirlerdiń birine barýdy josparlap otyr. Budan buryn habarlanǵandaı, 2024 jylǵy 30 jeltoqsanda Premer-mınıstrdiń orynbasary – Ulttyq ekonomıka mınıstri Qaraǵandy oblysynda bolyp, vedomstvonyń jumysy óńirlerdegi jumyspen kiriktiriletinin málimdegen bolatyn.

Qazaqstanda 2,8 mln gektar jer shegirtkege qarsy óńdelgenin jazǵan bolatynbyz.