Shaımardan Nurymov: Prezıdentti saılaý - halyq taǵdyryn aıqyndaıtyn mańyzdy is

NUR-SULTAN. QazAqparat - Qazaqstan Respýblıkasynyń Prezıdentin kezekten tys saılaýdy ótkizý týraly sheshim - óz ýaqytynda qabyldanǵan tarıhı sheshim. QR Parlamentiniń Májilis depýtaty, «Qazaqstan uıǵyrlarynyń respýblıkalyq etnomádenı ortalyǵy» qoǵamdyq birlestiginiń tóraǵasy Shaımardan Nurymov osyndaı pikir bildirdi, dep habarlaıdy QazAqparat.

Májilis depýtatynyń aıtýynsha, el tarıhynda memleket basshysyn saılaý, ony ádil de ashyq ótkizý qoǵam damýynyń qalypty jaǵdaıda jalǵasyn tabýyna arqaý bolatyny barshaǵa belgili. Elimizde turaqtylyq pen kelisimniń úndestik tabýy da, ekonomıkamyzdyń órleýi de, Qazaqstannyń gúldenip álemge tanymal elge aınalýy da Elbasy Nursultan Ábishuly Nazarbaev júrgizgen salıqaly da salmaqty saıasatynyń jemisi boldy. Mine, osy úrdis óz deńgeıinde jalǵasyn tabý úshin bıylǵy jyly Prezıdent saılaýyn joǵary deńgeıde ótkizýge árbir azamat atsalysýy qajet.

«Prezıdentti anyqtap, bılik tizginin ustatý - jaýapkershiligi zor, halyq taǵdyryn aıqyndaıtyn óte mańyzdy is», - deıdi Shaımardan Nurymov.

Sondaı-aq, Qazaqstan uıǵyrlarynyń respýblıkalyq etnomádenı ortalyǵy» qoǵamdyq birlestiginiń tóraǵasy álemde bolyp jatqan ózgerister, kúnde myń qubylǵan geosaıası jaǵdaılar bizdiń elimizdiń turǵyndarynan bir jeńnen qol shyǵaryp, bir jaǵadan bas shyǵaryp, bir úıdiń balalaryndaı uıymshyldyqpen alǵa qaraı birge qozǵalýyn, qımyldaýyn talap etetinin aıtty.

«Qazaqstan Respýblıkasynyń Prezıdenti Qasym-Jomart Kemeluly Toqaev halyqqa úndeýinde: «Elimizdiń keleshegi, ár otbasy men ár azamattyń taǵdyry Sizderdiń sheshimderińizge tikeleı baılanysty», - dep halqyna, ıaǵnı siz ben bizge tolyq senim men mindet artty. Aýyzbirshiligi myǵym eldiń ala almaıtyn asýy, asa almaıtyn beli bolmaıtyny árbirimiz biletin ómir qaǵıdasy. Sony basshylyqqa alyp, bir-birimizben qol ustasyp, bir urandy, bir baǵytty ustanyp kemel keleshekke birge attanaıyq, aǵaıyn!» - dedi ol sóz sońynda.

Foto: assembly.kz