Shatyrda saırańdaǵan jasóspirimder: Telefondarynan qaýipti oıyn tabylǵan joq

<p>ASTANA. KAZINFORM &ndash; Elordada kópqabatty úıdiń shatyrynda júrgen 7 jasóspirim anyqtalyp, olardyń zańdy ókilderi ákimshilik jaýapkershilikke tartyldy. Bul týraly Astana qalalyq polıtsııa departamentinen málim etti.</p>

Vedomstvo málimetinshe, polıtsııaǵa kópqabatty úıdiń shatyrynda qyz balanyń júrgeni týraly habarlama túsken. Oqıǵa ornyna kelgen quqyq qorǵaýshylar 7 jasóspirimdi ustaǵan.

«Jasóspirimder shatyrǵa kóteriletin esiktiń ashyq turǵanyn kórip, tóbege shyǵýǵa sheshim qabyldaǵany anyqtaldy. Olardyń zańdy ókilderiniń kózinshe mobıldi qurylǵylary tekserilip, qaýipti oıyndarǵa qatysý faktisi anyqtalǵan joq. Balalarǵa durys baqylaý jasamaǵany úshin olardyń zańdy ókilderi QR Ákimshilik quqyq buzýshylyq týraly kodekstiń 435-babymen ákimshilik jaýapkershilikke tartyldy. Sonymen qatar polıtsııa qyzmetkerleri aldaǵy ýaqytta mundaı oqıǵalarǵa jol bermeý úshin turǵyn úı keshenderi men úılerdiń shatyryna shyǵatyn esikterdi jabýǵa baǵyttalǵan is-sharalar qabyldap jatyr», - dep atap ótedi departamentten.

Osy oraıda polıtsııa ınternet pen áleýmettik jeli arqyly qaýipti is-áreketterge tartý qateriniń artyp turǵanyna baılanysty ata-analardy balalarynyń qaýipsizdigine jiti baqylaý jasaýǵa shaqyrady.

Áleýmettik jelide balalardy qaýipti is-áreketterge ıtermeleıtin oıyn tarap jatqanyn jazǵan bolatynbyz.