Shatasyp Shamǵa attanǵan qyz-kelinshekter kimder

ALMATY. QazAqparat - Elimizde bıyl «Jýsan» operatsııasy bastalyp, Sırııadaǵy DAISh uıymynyń (Irak jáne Shamdaǵy ıslam memleketi – IShIM nemese ISIM) aımaǵynda bolǵan jerlesterdi Qazaqstannyń arnaıy qyzmeti birneshe kezeńmen elge jetkizgeni belgili. Barlyǵy 516 adam, olardyń 357-i — balalar.

DAISh tobynyń qol astynda álem boıynsha 86 eldiń adamdary bolsa, sol elder óz azamattarynan bas tartyp, tipti keı memleketter azamattyqtan shyǵaryp tastap jatqanda, qazaq eliniń «Otanyn tárk etýshilerdi» arnaıy jobamen elge qaıtaryp, basynan sıpap, baýyryna basýyn árkim árqalaı baǵalaýda. Óz otandastarymyzdy aıtpaǵanda búkil arab elderi qazaqstandyq bıliktiń qaıyrymdylyǵyna qaıran qalyp jatqanyn da bilemiz.

Men tildesken bir top áıeldiń bireýi dúngen, qalǵany qazaq ultynyń ókilderi boldy. Arasynda joǵary bilimdileri, elimizdegi bedeldi ýnıversıtetterdiń túlekteri, sondaı-aq úı sharýasyndaǵy áıelder de bar.

Elimizdegi ordaly ýnıversıtette mamandanǵan, biraq keıingi ýaqytta tórt balasynyń tárbıesimen úıinde otyrǵan orta jastaǵy kelinshektiń kúıeýi quzyrly oryndarda qyzmet etken. Islam dinine 2002 jyldary kúıeýi úıretip, otbasynda Daryn Mýbarovtyń ýaǵyzdaryn tyńdap, Mýhammad Abdýl-Ýahabtyń kitaptaryn oqı bastaǵan.

«Siz kóp balaly otbasynda tárbıelenipsiz, on balanyń eń kenjesi ekensiz. Sonda sol ýaqytqa deıin halqymyzdyń dástúrli ustanymy, ımam aǵzam Ábý Hanıfa, hanafı mázhaby jaıly estigenińiz bar shyǵar?» degen saýalǵa jaýap bergen ol ıslam dininen múldem beıhabar bolǵanyn aıtqan. Tek kúıeýiniń aıtýymen namazǵa jyǵylyp, 2014 jyly úılerin satyp, ata-ana, aǵaıyn-týysqa aıtpaı, Sırııaǵa «Islam halıfatynda» ómir súrýge attanǵan. Alaıda 5 jyl tumannyń ishinde, soǵystyń ortasynda kúıeýi men jalǵyz ulynan aıyrylyp, úsh qyzymen elge jetkizildi.

«Sırııaǵa saparyńyz sizge ne berdi?» degende kemseńdep jylaı berdi, kúıeýine kózsiz senip, sońynan botalaryn jetektep kete barǵan sherli ananyń ishki álemi ókinishten alaı-dúleı bolyp jatqanyn ańǵarý da qıyn emes edi...

Bul kelinshek qaqtyǵys aımaǵynda kóp qıynshylyq kórdi. Oǵan psıhologııalyq turǵydan kómek qajet. Qazir mamandar bul kisimen jan-jaqty jumystar júrgizip jatyr. Oǵan dinderdiń rýhanı jáne moraldyq komponentteri, áıelderdiń róli men áleýmettik mártebesi, qazirgi qoǵamdaǵy analar, destrýktıvti dinı birlestikterge qarsy turý máseleleri túsindirildi.

Aısha KEŃESBAI

dintanýshy-jýrnalıst