Sharyn jáne Altynemel ulttyq parkterine bir jylda qansha týrıst keldi

NUR-SULTAN. QazAqparat – Byltyr Sharyn jáne Altynemel memlekettik ulttyq tabıǵı parkterine 60 myńǵa jýyq týrıst keldi. Bul týraly búgin elordada ótken «Ulttyq parkter: ekologııalyq týrızmniń jańa modeli» atty dóńgelek ústel otyrysynda aıtyldy, dep habarlaıdy QazAqparat tilshisi.

«Búginde Altynemel jáne Sharyn ulttyq parkteri aýmaǵynda ishýge bolatyn sýburqaqtar, demalys oryndyqtary, qoqys jáshikter qoıylyp, aqparattyq taqtaıshalar ilindi. Endigi ýaqytta atalǵan ulttyq parkter aýmaǵynda qazaq aýylyn, glempıng, kempıng salý josparlanyp otyr. Ulttyq parkter aýmaǵyna jetý máselesi de sheshilgen. ıAǵnı park aýmaǵyna deıin asfalt tóseldi, odan ári bolmaıdy. Sebebi park ishindegi ań, janýarlardyń shyrqyn buzbaý mańyzdy», - dedi «QazaqGeography» respýblıkalyq qoǵamdyq birlestiginiń Altynemel jáne Sharyn ulttyq parkinde týrıstik ınfraqurylymdy qurý jáne damytý jobasynyń jetekshisi Tomırıs Musaeva.

Onyń aıtýynsha, atalǵan eki ulttyq parkin tamashalaýǵa kórshi elderdiń arasynan Reseıden týrıster jıi keledi.

«Ótken jyly Sharyn ulttyq parkine 40 myńǵa jýyq týrıst keldi, al Altynemeldi 20 myńǵa jýyq kelýshi tamashalady», - deıdi ol.

Buǵan deıin Sharyn memlekettik ulttyq tabıǵı parki aýmaǵynda týrızmdi damytý maqsatynda 4,5 mlrd teńge ınvestıtsııa tartylǵany týraly habarlaǵan edik.

Sondaı-aq, dóńgelek ústel barysynda ulttyq parkterde 685 shaqyrymdyq týrıstik marshrýt jasalǵany aıtyldy.