Sharyn shatqalynda sel júrip, eki adam mert boldy

TALDYQORǴAN. QazAqparat - Almaty oblysynyń Sharyn shatqalynda sel júrip, 2 adam mert boldy. Taǵy 6 adam zardap shekti, dep habarlaıdy QazAqparat tilshisi.

Almaty oblystyq TDJ baspasóz qyzmeti taratqan habarlamada, kóz jumǵan adamnyń biri kámelettik jasqa tolmaǵan jasóspirim ekendigi aıtylady.

«29 mamyr kúni kúndizgi saǵat 13:35 shamasynda Sharyn shatqalynda sel júrip eki adamnyń mert bolǵany jóninde habarlama tústi. Onyń bireýi kámelettik jasqa tolmaǵan jasóspirim. Zardap shekkenderge jedel túrde medıtsınalyq kómek kórsetildi»,- dep málimdedi atalmysh departamenttiń baspasóz qyzmeti.

Resmı aqparatqa sáıkes, qazir oqıǵa ornynda 31 qutqarýshy, 8 tehnıka jáne jedel járdemniń 4 kóligimen 6 qyzmetkeri jumys istep jatyr.

«Osy 8(7282)22-02-13, 22-02-18 nómirler boıynsha arnaıy jeli qosylǵan. Qajetti psıhologııalyq kómek kórsetilýde «,- dep tolyqtyrdy baspasóz qyzmeti.

Sel jaýyn saldarynan júrgen. Taǵy bir adam iz-túzsiz joǵalǵan. Qazir izdestirý jumystary júrip jatyr.