Sharyn shatqalynda sel júretindigi nelikten aldyn ala eskertilmedi

NUR-SULTAN. QazAqparat – Sharyn shatqalynda laı-sel kóshkini júretindigi týraly nelikten aldyn ala eskertý jasalmady? Bul saýalǵa QR TJM Azamattyq qorǵanys jáne áskerı bólimder komıtetiniń tóraǵasy Baýyrjan Syzdyqov jaýap berdi, dep habarlaıdy QazAqparat tilshisi.

«Sharyn shatqaly jáne onyń saı-salasy sel júrý qaýpi bar aımaq ekendigin túsinýge tıispiz. Sol aýdanda TJM-ǵa qarasty «Qazseldenqorǵaý» mekemesiniń bólimshesi joq. Osy kúnderdiń ishinde Qazgıdrometten Almaty qalasy jáne Almaty oblysynyń tótenshe jaǵdaılar departamentterine qandaı da bir sel júretindigi týraly daýyldy eskertý bolǵan emes», - dedi komıtet tóraǵasy Ortalyq kommýnıkatsııalar qyzmetindegi baspasóz máslıhaty barysynda BAQ ókilderiniń saýalyna oraı.

Onyń atap ótýinshe, nóser jaýynnyń saldarynan laıly sel júrip ótken. Sonymen qatar ol Sharyn shatqaly aýmaǵyndaǵy uıaly baılanystyń nasharlyǵyna qatysty saýalǵa jaýap berdi.

«Uıaly baılanysqa qatysty aıtar bolsam, bizde taýly jerlerde baılanys bola bermeıdi. Muny biz túsinýge tıispiz. Týrısterdiń mindetti saqtandyrý týraly zańǵa sáıkes, týrıstik operator jumys jasaýy kerek», - dedi Baýyrjan Syzdyqov.

Esterińizge sala ketsek, Almaty oblysynyń Sharyn shatqalynda sel júrip, 2 adam mert boldy. 6 adam zardap shekti.

Bir oqýshy qyzdy sel aǵyzyp áketip, ony birneshe saǵattan keıin qutqarýshylar aman-esen taýyp aldy.