«Sharýanyń sózin kim tyńdaıdy?» - baspasózge sholý
Qazaqstan halqy el damýy men birliginiń, azamattar quqyqtarynyń múltiksiz saqtalýynyń kepili - Konstıtýtsııa kúnin jan-jaqty atap ótýde. Búginde Ata Zańymyz 19 jyl ishinde qoǵam men bıliktiń turaqtylyǵyn qamtamasyz etýge ólsheýsiz úles qosyp keledi. Osy ulyq merekege oraı Elbasy Nursultan Nazarbaev barsha qazaqstandyqtarǵa quttyqtaý joldady. Quttyqtaý mátini «Egemen Qazaqstan» jáne basqa da resmı basylymdarda jarııalandy. «Bizdiń Konstıtýtsııamyz «Qazaqstan-2050» Strategııasynyń álemniń eń damyǵan 30 eliniń qataryna enýi jónindegi tarıhı maqsattary men mindetterin iske asyrýdyń berik negizi bolyp tabylady. Kelesi jyly respýblıkalyq referendýmda elimizdiń Konstıtýtsııasynyń qabyldanǵanyna 20 jyl tolady. Ata Zańymyzdyń mereıtoıy jalpymemlekettik deńgeıde Qazaqstan halqy Assambleıasynyń 20 jyldyǵymen birge toılanady. Osy eki aıtýly oqıǵa jylnamamyzdaǵy ortaq baılanysty quraıdy. Barsha qazaqstandyqtarǵa shyn kóńilden beıbitshilik pen yntymaq, tabys pen qut-bereke tileımin!», delingen Memleket basshysy quttyqtaýynda.
«Egemen Qazaqstan» gazetiniń jazýynsha, keshe «Samuryq-Qazyna» AQ jekeshelendirý baǵdarlamasyna baılanysty bolashaqta ınvestor bolýǵa nıetti kompanııalar basshylarymen kezdesý ótkizdi. Shara barysynda qor men onyń enshiles kompanııalarynyń jetekshileri jekeshelendiriletin aktıvterdi satý erejelerin túsindirip, «Samuryq-Qazyna» AQ tobynyń jyldyń aıaǵyna deıin satylýy josparlanǵan negizgi nysandarymen tanystyrdy. Qor basqarma tóraǵasynyń orynbasary Elena Bahmýtova, kirispe sózinde ınvestorlar qaýymdastyǵymen baılanysty nyǵaıtý qor aktıvterin satý baǵdarlamasynyń tıimdiligin arttyrýǵa oń yqpal etetinin atap ótti. «Kezdesýdiń mundaı keń kólemde uıymdastyrylý maqsaty - sizderdi el Úkimetiniń qaýlysy arqyly bekitilgen erejelermen, aktıvterdi saýdalaý baǵdarlamasynyń negizgi qaǵıdalarymen tolyǵyraq tanystyrý. Ózderińiz bilesizder, osy baǵdarlamaǵa sáıkes biz 2014-2020 jyldar aralyǵynda 106 aktıvti satylymǵa shyǵarýdy josparlap otyrmyz. Sondyqtan 2014 jyly josparǵa sáıkes 64 nysandy satylymǵa qoıamyz, olardyń bireýi «Halyqtyq ІRO»-ǵa shyǵarylady», - dedi E.Bahmýtova. Maqala «Jyl sońyna deıin 64 nysan jekeshelendiriledi» degen taqyryppen berilgen.
«Aıqyn» gazetiniń jazýynsha, «Bátýa» JShS - soıa ósirý boıynsha Qazaqstandaǵy eń úlken jobany júzege asyryp jatqan uıym. Qazirgi kezde 5000 gektar jerdi ıgerip, júzdegen jumys ornyn ashyp otyr. Alaıda, elimizdegi eń iri aýyl sharýashylyq jobalardyń biriniń jumysy shatqaıaqtap tur. Shyǵys Qazaqstan oblysy, Úrjar aýdanynda soıa ósirýmen aınalysatyn «Bátýa» jeke sharýa qojalyǵynyń basshylary «jergilikti sheneýnikterdiń kesirinen bıylǵy ónimniń bir bóliginen aıyrylyp, shyǵynǵa batatyn boldyq» deıdi. Óıtkeni sharýa qojalyǵyna aýadaı qajet memlekettik sýbsıdııanyń bólinbegenine 2 aı bolǵan. Qarjynyń keshigýi aýyl sharýashylyq jumystaryna kesirin tıgizýde. «2 aıdan beri sýǵa bólinetin sýbsıdııa keshiktirilip jatyr. Jalpy somasy 183 mıllıon teńge. Shilde aıynda bólinetin 64 mıllıon teńge 1,5 aı keshikti. Al tamyzdaǵy 55 mıllıon teńge áli jetken joq. Biz bul qarjyny qaıda jumsaıtynymyzdy josparlap qoıǵanbyz. Aýyl sharýashylyǵynda barlyq is kezeń-kezeńimen júzege asyrylýy kerek. Ýaqytynan keshigip qalýǵa bolmaıdy. Bizge sýǵa bólinetin aqsha týra sýarý maýsymynda keshiktirildi. Janar-jaǵarmaıǵa, sýǵa, jumysshylardyń jalaqysyna tóleıtin qarjydan tapshylyq kórdik», - deıdi «Bátýa» JShS bas dırektory Asqar Іzimǵalıev. Maqala «Sharýanyń sózin kim tyńdaıdy?» degen taqyryppen berilgen.
«Almaty kóshelerine ilingen bılbord jurtshylyqtyń nazaryn eriksiz aýdaryp, qyzý talqyǵa túse bastady. Qalanyń kórneki oryndaryna qoıylǵan jarnamalyq taqtaıshalardaǵy sýret alkogoldi ishimdikterdi mólsherden tys paıdalanǵandardyń birte-birte adam keıpinen aıyrylyp, shoshqaǵa aınalatynyn beıneleıdi», dep jazady «Aıqyn» gazeti senbilik nómirindegi «Aq araqtan bir bosamaı kesemiz, árkimderge ketip jatyr esemiz...» degen taqyryptaǵy aqparatynda. Basylymnyń jazýynsha, áleýmettik joba avtorlary osy ıdeıa arqyly maskúnemdiktiń aqyry qaıda aparyp soqtyratynyn eske salǵysy kelgendikterin aıtady. Bılbord dızaınyn «Bizdiń tańdaý» qoǵamdyq qozǵalysynyń tapsyrysymen jergilikti avtorlar jasaǵan. Olardyń oıynsha, bul kartına bir qaraǵanda kúlki shaqyrǵanymen, kim-kimdi bolmasyn túbi oılandyrmaı qoımaıdy. «Salynyp ishken adam men shoshqanyń aıyrmashylyǵy az» degen tujyrymdy jetkizýge tyrysqan. «Samuryq-Qazyna» qorynyń qarjy dırektory Nurlan Rahmetov qazaqstandyqtar aldynda qaltasyn qaıyryp, tabysyn jarııa etti. Sóıtsek, ol kedeı emes eken. Tek 2013 jyldyń ózinde ǵana bonýs retinde 29,8 mln. teńgeni qaltasyna basqan eken. Bul jaıynda «Ekspress-K» gazetinde jaryq kórgen «Nam ı ne snılos» degen taqyryptaǵy maqalada baıandalǵan. Basylymnyń naqtylaı túsýinshe, 2012 jyly Nurlan Rahmetov alǵash ret óziniń jalaqysyn jarııa etken. Ol kezde onyń taza qolyna alatyn jalaqysy 1,2 mln. teńge bolǵan. «Qyrkúıekte bastalatyn múlik pen kapıtaldy zańdastyrý aıasynda Qazaqstan ekonomıkasyna 10 mlrd. dollar tartý kózdelip otyr», dep jazady «Vremıa» gazeti «Iz tenı v svet perepolzaıa» degen taqyryptaǵy maqalasynda. Maqalada QR Ulttyq banki tóraǵasynyń orynbasary Qýat Qojahmetovtiń sózi keltirilgen. «Zańdastyrý qazir asa qajet. Óıtkeni, birinshiden, bul ekonomıkaǵa,bank sektoryna qosymsha qarjy tartady. Ekinshiden, qazirgi ýaqytta syrtqy qor naryqtarynda ahýal nasharlap otyr. Sol sebepti ekonomıkaǵa qosymsha aqsha tartqan durys», - dedi ol.