Sharýalarǵa dızel otyny arzandatylǵan baǵamen berilýde

ASTANA. QazAqparat - Elimizde egin oraǵy naýqany kezinde aýyl sharýashylyǵy taýarlaryn óndirýshige dızel otyny tómendetilgen baǵamen, ıaǵnı lıtri 92 teńgeden jetkizilýde.

Aıta keterligi, respýblıkanyń aýyl sharýashylyǵy taýaryn óndirýshileriniń aǵymdaǵy jylǵy kúzgi dala jumystaryn júrgizýine 391,6 myń tonna dızel otyny qajet. Mundaı kólemdegi dızel otyny elimizde bar.

Óńirlerdegi arzandatylǵan dızel otynynyń 1 lıtriniń baǵasy aýyl sharýashylyǵy taýaryn óndirýshiler úshin orta eseppen 92 teńgeni qurap otyr. al  ózge janarmaı stansalarynda dızeldiń 1 lıtri 108 teńgeni quraıdy. Demek, bul sharýalarǵa dızel naryqtyq baǵadan 15 paıyzǵa arzan jóneltilýde degen sóz.

Aǵymdaǵy jyldyń 10 tamyzyndaǵy jaǵdaıǵa sáıkes Energetıka jáne Aýyl sharýashylyǵy mınıstrlikteri birlesip bekitken MÓZ-ge oblystardy bekitý kestesi boıynsha jetkizýshiler aýyl sharýashylyǵy taýaryn óndirýshilerge kúzgi dala jumystaryn júrgizýge 126 myń tonna dızel otynyn tıep, jóneltti. Bul josparlaǵan kólemniń 32 paıyzyn quraıdy.