Sharýalarǵa beriletin 2,5 paıyzdyq nesıeniń sharttary bekitildi

ASTANA. QazAqparat – Aýyl sharýashylyǵy mınıstrliginiń agroónerkásiptik keshen salasyndaǵy jobalarǵa kredıt berý qaǵıdalary týraly buıryǵy kúshine endi, dep habarlaıdy QazAqparat tilshisi.

Qujatta jergilikti ákimdikter bıýdjettiń kredıt qarajatyn senim bildirilgen ókilge tapsyrma sharty boıynsha beretini aıtylǵan. Al jergilikti ákimdiktiń ózine bul kredıt respýblıkalyq bıýdjetten 0,01 paıyz jyldyq syıaqymen beriledi.

Jergilikti ákimdik joba usynýshylarǵa bul kredıtti 10 jylǵa deıingi merzimmen, eń joǵary somasy 5 mıllıard teńgeden aspaıtyndaı etip, nomınaldy jyldyq syıaqy mólsherlemesin 2,5 paıyzdan asyrmaı, AÓK salasyndaǵy jańa jobalardy qurýǵa nemese qoldanystaǵylardy keńeıtýge berilý kerek.

Kredıt suralatyn jobalar myna baǵyttardy qamtýy tıis:

taýarlyq sút fermalary (qýaty 400 bastan bastap);

etti baǵyttaǵy qus fabrıkalary (jylyna 5000 tonna qus etinen bastap);

kókónis saqtaý qoımalary (1000 tonnadan bastap);

qazirgi zamanǵy sý únemdeý tehnologııalaryn (shashyratyp, tamshylatyp sýarý) paıdalanylatyn sýarmaly eginshilik (kartop pen kókónister, azyq óndirisi).

Kredıt alýshynyń kepilge qoıatyn múlki bolýy shart.

Sondaı-aq, negizgi boryshty óteýge 24 aıdan aspaıtyn jeńildik merzimi beriledi.