Sharýalardan túsken 123 myń sýbsıdııa ótinishiniń 67 myńy ǵana maquldanǵan

<p>ASTANA. KAZINFORM &ndash; Aýyl sharýashyǵy vıtse-mınıstri Baǵlan Bekbaýov ortalyq kommýnıkatsııalar qyzmetinde ótken baspasóz máslıhatynda elektrondy nusqada berilgen sýbsıdııa ótinishteriniń jartysyna jýyǵy maquldanbaǵanyn aıtty.</p>

«2024 jylǵy 1 qazandaǵy jaǵdaı boıynsha, júıe arqyly 254 mlrd teńge somaǵa 123 myńnan astam ótinim berilip, 67 080 ótinim maquldandy. Mal sharýashylyǵy sektorynda sút pen ettiń qunyn arzandatýǵa arnalǵan sýbsıdııalar joǵary suranysqa ıe. Sondaı-aq, aýyl sharýashylyǵy tehnıkasyn jáne ósimdikterdi qorǵaý quraldaryn satyp alýdyń ósýi baıqalady», - dedi vıtse-mınıstr.

Baǵlan Bekbaýov «Aýyl amanaty» baǵdarlamasyna qatysýshylardyń ótinishi de elektrondy júıede qabyldanatynyn aıtty. 

«Baǵdarlamada mal sharýashylyǵyn, ósimdik sharýashylyǵyn, aýyl sharýashylyǵy kooperatsııasyn, sondaı-aq aýyl sharýashylyǵyna jatpaıtyn bıznesti damytýǵa 2,5% paıyzdyq mólsherlememen shaǵyn nesıe berý kózdeledi. Baǵdarlama aıasynda kooperatıvter qurýdy yntalandyrý úshin aýyl sharýashylyǵy kooperatıvterine eń joǵary somasy 8 myń aılyq eseptik kórsetkishke (29,5 mln teńge-red.) deıin kredıt berý qarastyrylǵan», - dedi ol.

Mınıstrliktiń deregi boıynsha, «Aýyl amanaty» jobasy iske asyryla bastaǵannan beri óńirlerde 400-den astam kooperatıv qurylǵan.

Belgili sarapshy, «Aýyl» partııasy tóraǵasynyń birinshi orynbasary Tóleýtaı Rahymbekovtiń aıtýynsha, keıingi 22 jylda aýyl sharýashylyǵyna bıýdjetten bólinetin sýbsıdııa kólemi 150 ese ósken. 

«Jalpy aýyl sharýashylyǵyna memleket tarapynan qomaqty qarjy bólinip otyr. Sýbsıdııanyń ózi 500 mlrd teńgege jetti. Mysaly, 2002 jyly salaǵa bólinetin sýbsıdııanyń kólemi 3,5 mlrd teńge bolatyn. Sodan bergi 22 jyldyń ishinde 150 ese ósti», - deıdi sarapshy. 

Buǵan deıin memleket Gosagro saıtyna jyl saıyn 150 mln teńge jumsap otyrǵanyn jazdyq.