Sharýalar óz ónimderin egin basynan satýǵa májbúr – Qasym-Jomart Toqaev

NUR-SULTAN. QazAqparat – Reformalar jónindegi joǵary keńestiń otyrysynda Memleket basshysy Qasym-Jomart Toqaev azyq-túlik baǵasy máselesin kóterip, óndirýshi men tutynshý arasyndaǵy deldaldardy azaıtýdy tapsyrdy, dep habarlaıdy QazAqparat tilshisi.

Keńeste bul másele boıynsha Saýda jáne ıntegratsııa mınıstri Baqyt Sultanov baıandama jasady.

Prezıdent elde óndiris bar bolǵanymen, ony uıymdastyrý, alynǵan ónimdi saqtaý jáne ótkizý júıesi durys jolǵa qoıylmaǵanyn atady. Onyń dálelei retinde bıyl azyq-túlik baǵasynyń qubylýy bekitilgen mejeden alshaqtap ketkenin atady.

«Shuǵyl sharalar, baǵaǵa qoıylǵan baqylaý naryqtyq ekonomıkanyń irgeli qaǵıdattaryn almastyra almaıtyny belgili. Júıeli sharalar kerek. Sondyqtan ulttyq taýar ótkizý júıesin qalyptastyrý atalǵan jumystyń mańyzdy quraýshy bóligi bolyp tabylady. Kóterme-taratý ortalyqtary jáne olardyń standarttaý, taýardyń turaqty jetkizilýin qamtamasyz etý jónindegi jumystary óndirýshilerdiń, sonyń ishinde shaǵyn bıznes ókilderi kooperatsııasynyń mańyzdy elementteriniń biri bolýǵa tıis», - degen Memleket basshysy baǵany retteý sharalary aýyldaǵy jeke qosalqy sharýashylyqpen aınalysatyn adamdarǵa kesirin tıgizbeýi kerektigin eskertti.

«Búginde mundaı kásip ıelerin ekonomıkalyq aınalymǵa tartý jumystary mardymsyz júrgizilýde. Sonymen qatar olar óz ónimderin egin basynan satýǵa májbúr bolyp otyr. Kóterme-taratý ortalyqtarynyń taǵy bir mindeti – «egis basynan sórege» deıingi joldaǵy qajetsiz deldaldardy joıý. Halyq úshin azyq-túliktiń qoljetimdi baǵada bolýyn is júzinde retke keltirý qajet», – dedi Qasym-Jomart Toqaev.