Sharýalar óńdeýge 280 myń tonnadan astam qyzylsha ótkizdi
Respýblıkada qyzylsha ósiretin negizgi óńirler - Almaty, Jetisý jáne Jambyl oblystary. Sebebi, osy óńirlerde qant qyzylshasyn óńdeıtin negizgi óndiristik kásiporyndar ornalasqan. Otandyq qyzylsha ósirýshiler bıyl óńdeýge 281 myń tonna shıkizat tapsyrdy.
«Búgingi kúni memleket osy kúrdeli daqyldy ósirýge jumsalatyn shyǵyndardy ishinara sýbsıdııalaıdy, sondaı-aq zaýyttarǵa tapsyrylǵan ónimdi sýbsıdııalaıdy. 2021 jyly óńirlerdegi qyzylsha ósirýshiler shamamen 3 mlrd teńge aldy.
2022 jyly sýbsıdııalaý normatıvi 3 myń teńgege ulǵaıyp, óńdeýge tapsyrylǵan qant qyzylshasynyń tonnasy úshin 15 myń teńgeni qurady. Zaýyttar shıkizatty tonnasyna 15 myń teńgeden satyp alady. Túptep kelgende, sharýalardyń ónimine 30 myń teńge tólenedi», - dep jazdy vedomstvodan.
Mınıstlik 2023 jyldan bastap sýbsıdııalaý normatıvi 15 myń teńgeden 25 myń teńgege deıin ulǵaıatynyn málimdedi, sonyń arqasynda qyzylsha ósirýshiler óz óniminiń ár tonnasyn 40 myń teńgege satatyn bolady. Osylaısha, qant qyzylshasynyń rentabeldiligi basqa daqyldardyń deńgeıine jetkiziledi.
«Budan bólek, qant salasyn damytýdy yntalandyrý sheńberinde ınvestıtsııalyq sýbsıdııalaý tizbesine jańa qant zaýyttarynyń qurylysy engizilmek, kapıtal salymdarynyń 25% memleket óteıtin bolady.
Qyzylsha jınaıtyn kombaındar men sýarý tehnıkalaryn satyp alýǵa ótemaqy normatıvin 25%-dan 50%-ǵa deıin ulǵaıtý máselesi pysyqtalyp jatyr. Sýbsıdııalaýdyń jańa erejeleri 2023 jylda bastap kúshine enedi dep kútilip otyr», - delingen habarlamada.
Aıta keteıik, 2026 jylǵa deıin qant salasyn damytý jónindegi keshendi jospardy iske asyrý aıasynda egistik alqaptaryn 38 myń gektarǵa deıin ulǵaıtý josparlanyp otyr.