Sharýalar Qazaqstanda jasalǵan ushaqtarǵa qyzyǵýshylyq tanytpaı otyr

ASTANA. QazAqparat - Osydan bes jyldaı ýaqyt buryn elimizde 4 oryndy «Araı» ushaqtary jasala bastaǵan bolatyn. Otandyq ushaq dep qýanǵanymyzben, onyń sharýalar arasynda suranysy bolmaı otyr. 2010 jyldan beri óndirýshi kásiporyn atalǵan tehnıkanyń tek jeti ǵana danasyn satqandyǵyn aıtyp otyr.

Ushaqtardy shyǵarýmen aınalysatyn «Avıa Master Eırkraft» JShS basshysy óz ónimin qaıta jarnamalaý úshin búgin Astanada ótip jatqan «KazAgro/«KazFarm-2015» kórmesine kelip qatysty. Dáýren Ýálıevtiń aıtýynsha, atalǵan kólikterdiń agrargylarǵa tıgizer paıdasy orasan bolǵanymen kópshiligi baǵasyna kelgende kidirip qalady eken. Bir ushaqty satyp alý úshin sharýalar 221 myń AQSh dollaryn tóleýi qajet.

«Biz «Araı» ushaǵyn kanadalyq «ZENAIR LTD» kompanııasymen birigip shyǵaramyz. Buǵan deıingi jasap shyǵarǵan úsh ushaǵymyzdy Qostanaı oblysyndaǵy «Zernovaıa ındýstrııa» kompanııasy satyp aldy. Taǵy bir ushaǵymyzdy Reseıge eksporttadyq. Óz taýarymyzdy shetelge shyǵarý biz úshin úlken jetistik. Fermerler bul ushaqty paıdalaný arqyly ýaqyt pen qarajatyn únemdeıdi. Máselen, «Araı» bir saǵatta bar-joǵy 35 lıtr ǵana benzın jumsaıdy. Negizinen, bul áýe kóliginiń motoryn Kanadadan alyp kelemiz, al qalǵan quraldary Qazaqstanda jasalady. Bizdiń bir ushaqtyń baǵasy 221 myń AQSh dolary. Biz tek tapsyryspen ǵana shyǵaramyz. Osy kórmege ushaqty otandyq fermerler kórip, bizge suranys artady degen maqsatta qoıyp otyrmyz», - deıdi ol.

Qalaı bolǵanda da, «Araıdyń» baǵasy ózin barlyq jaǵynan alyp qaraǵanda aqtaıdy deıdi kásipker. Óıtkeni, onyń shyǵyny rasymen de az. Máselen, eger «AN-2» ushaǵyna eki ushqysh kerek bolsa, buǵan bir ushqysh jetkilikti. Onyń ústine «Araıǵa» arnaıy daıarlanǵan ushý alańy qajet emes. Qysqa alańdar, egistiń mańyndaǵy bos alańqaılar jetkilikti. Al «AN-2» ushaǵyna janarmaı quıý úshin áýejaıǵa qaıtyp oralýyna týra keledi.

Úsh kúnge sozylatyn osynaý kórme barysynda Dáýren Ýálıev jańa klıentter tabaryna senimdi.

Al Astanadaǵy «Kórme» ortalyǵynda bastalǵan kórme-aýktsıon 29 qazanǵa deıin jalǵaspaq. Bul jerde aýylsharýashylyq tehnıkalarymen birge egin tuqymdary, et pen sút ónimderi, tipti, asyl tuqymdy mal da ákelindi. «Qaısar» jáne «Naıza» - eń tańdaýly angýs asyl-tuqymdy atalyq buqalardy kórmege Qostanaı oblysy Arqalyq qalasynyń «Nur-Jaılaý NS» JShS ákelip otyr.