Sharýa qojalyǵynyń basshysy 47 jastaǵy er adamdy quldyqta ustaǵan

NUR-SULTAN. QazAqparat – Aqtóbe oblysynda sharýa qojalyǵynyń basshysy 47 jastaǵy er adamdy quldyqta ustaǵan. Bul týraly QR ІІM krımınaldyq polıtsııa departamenti bastyǵynyń orynbasary Qanat Nurmaǵambetov aıtty, dep habarlaıdy QazAqparat tilshisi.

«Aqtóbe turǵyny 47 jastaǵy er adamdy áleýmettik jaǵdaıynyń tómen ekendigin paıdalanyp ári aldaý arqyly 7 aı boıy jumysqa jekken. Zardap shegýshi kúnine 12 saǵat mal baǵyp, jaqyn eldi mekennen 50 shaqyrym qashyqtaǵy qystaýda turǵan. Jumys isteýden bas tartqan kezde ony uryp-soǵyp, psıhologııalyq qysym kórsetken. QR Qylmystyq kodeksiniń 128-babymen tergeý júrgizilip jatyr», - dedi ol ІІM baspasóz qyzmeti alańynda ótken brıfıngte.

Onyń atap ótýinshe, zardap shegýshi ońaltý kómegin alý úshin daǵdarys ortalyǵyna jiberildi.

«Sonymen qatar «STOP trafık« jedel aldyn alý is-sharasy barysynda polıtsııa qyzmetkerleri iz-túzsiz joǵalǵan 3 adamnyń turǵylyqty jerin anyqtap, izdeýde júrgen 3 qylmyskerdi ustady», - dedi Qanat Nurmaǵambetov.