Sharm-el-Sheıhten kelgen jolaýshydan 200-den astam dinı mazmundaǵy kitap tárkilendi

NUR-SULTAN. QazAqparat – Shymkent áýejaıynda Sharm-el-Sheıhten ushyp kelgen reıs jolaýshylaryn tekserý kezinde 31 jastaǵy jigitten 222 dinı mazmundaǵy kitap tárkilendi, dep habarlaıdy QazAqparat Kóliktegi polıtsııa departamentiniń baspasóz qyzmetine silteme jasap.

«5 shilde kúni Shymkent qalasynyń áýejaıynda halyqaralyq «Sharm-el-Sheıh-Shymkent» reısimen kelgen jolaýshylardy tekserý kezinde Túrkistan qalasynyń 31 jastaǵy turǵynynan 222 dinı mazmundaǵy kitap tabyldy jáne tirkilendi.

Shymkent stantsııasyndaǵy jelilik polıtsııa bóliminiń qyzmetkerleri zań buzýshyǵa qatysty QR Ákimshilik quqyq buzýshylyq týraly Kodeksiniń 490-baby 1-tarmaǵy 3-tarmaqshasy (Dinı ádebıetti jáne dinı mazmundaǵy ózge de materıaldardy, dinı maqsattaǵy zattardy ákelý, ázirleý, shyǵarý, basyp shyǵarý jáne taratý) boıynsha hattama toltyryp, materıaldar sotqa joldandy.

2 tamyzda Shymkent qalasynyń ákimshilik soty aıyptalýshyny jaýapqa tartyp, oǵan 50 AEK, ıaǵnı 153 450 teńge aıyppul salyndy», - delingen resmı habarlamada.

Foto: pixy.org