Sharıǵat zańyna qaıshy emes: dintanýshy vaktsınalaý jaıynda

ALMATY. QazAqparat - Almaty qalasynyń Din isteri basqarmasynyń aqparattyq-túsindirý tobynyń múshesi, fılosofııa ǵylymdarynyń doktory Gúlnar Jumanova onlaın brıfıng barysynda vaktsına salý jónindegi ıslamdyq pátýa týraly aıtty, dep habarlaıdy QazAqparat tilshisi.

Spıker qazirgi teologııa barlyq ózekti máselelerge, sonyń ishinde densaýlyq saqtaý men vaktsına salýǵa qatysty suraqtarǵa jaýap beretinin jetkizdi.

Onyń pikirinshe, sharıǵat erejeleriniń biri - qaýiptiń aldyn alý. Sondyqtan ımmýndaýdy júrgizgen jón, óıtkeni vaktsına salýdyń zııannan góri paıdasy kóp. Demek, ekpe saldyrý óte qajet.

«Máselen, BAÁ, Túrkııa, Malaızııa sııaqty musylman elderinde koronavırýsqa qarsy vaktsına ýlema pátýasynyń ruqsatymen júrgiziledi. Saýd Arabııasy vaktsınatsııamen qamtý boıynsha álemdegi eń joǵary elderdiń biri jáne osy el úkimetiniń ótinishi boıynsha Mekkege qajylyqqa qatysýshylardyń barlyǵyna COVID-19 vaktsınasy mindetti. Al, bizdiń elde kóp jyldar boıy Qazaqstan musylmandary dinı basqarmasynyń pátýasy qoldanysta. Onda «ıslamda adam ómiri men densaýlyǵynan artyq qundylyq joq, sondyqtan árkim óz densaýlyǵyna erekshe nazar aýdarýy kerek delingen», - deıdi spıker.

Gúlnar Jumanova «aýyryp em izdegenshe aýyrmaıtyn jol izde» degendi basa aıtty. Sondyqtan ár adam dertti emdeý men onyń aldyn alý joldary týraly oılanýy tıis.

«Sharıǵat zańy vaktsınaǵa ruqsat etedi. Bizdiń elde jáne álemde epıdemııalyq jaǵdaıdyń nasharlaýyna baılanysty, ımmýndaý shuǵyl túrde qajet. Sondyqtan QMBD turǵyndardy densaýlyqtary men ómirlerin saqtap qalý úshin vaktsınalanýǵa shaqyrady. Allanyń qalaýy – adamdardyń deniniń saý bolýy, al basty áreket – ekpe saldyrý. Sonda ǵana ózimiz de, elimiz de qaýipsiz bolady», - dedi Gúlnar Jumanova.