Shardaranyń 80 paıyz balyq ónimi shetelge eksporttalady

ShYMKENT. QazAqparat - Ońtústik Qazaqstan oblysy Shardara aýdanynda jylyna bes myń tonnadan astam balyq ónimin óndirýge qaýqarly 4 balyq óńdeý zaýyty bar. Bul kásiporyndar  jyl basynan beri 1,3 mlrd. teńge somasyna 1300 tonna balyq óńdep, onyń 80 paıyzyn Reseı, Germanııa, Izraıl, Grýzııa jáne Ózbekstan elderine eksporttady. Qalǵan 20 paıyzy ishki naryqta saýdalanýda, dep habarlaıdy QazAqparat HAA tilshisi.

Shardara aýdanynyń áleýmettik-ekonomıkalyq ahýalymen tanysý maqsatynda arnaıy jumys saparymen barǵan oblys ákimi Janseıit Túımebaev balyq sharýashylyǵymen aınalysatyn «Hamıt» aýyl sharýashylyǵy óndiristik kooperatıvinde boldy. Balyq óńdeý zaýytynyń protsesimen tanysqan aımaq basshysy bul sharýashylyqta kooperatıvter qurý arqyly ónimniń kólemin  ulǵaıtýǵa bolatynyn jetkizdi. Muzdatylǵan, ystalǵan jáne tuzdalǵan balyq pen fıle ónimderin shyǵaratyn kásiporynnyń jyldyq qýattylyǵy 2500 tonnany quraıdy. 250 adamǵa jumys taýyp berip otyrǵan bul zaýyt shet memleketterge básekege qabiletti balyq ónimderin shyǵarýmen tanymal.

Óńir basshysy atalǵan kásiporynnyń sý qoımasynda ornalasqan torly sharbaqtaǵy balyq ósirý jumysymen de tanys boldy. Bul qoımady ótken jyly 39 tonna balyq qoldan ósirilip shyqsa, bıyl bul kórsetkish eki esege ulǵaıtylyp, ıaǵnı, 80 tonnaǵa deıin jetkizilmek. Jalpy aýdanda balyqty qoldan ósirý jáne molaıtý sharýashylyǵymen aınalysatyn 5 kásiporyn bolsa, olarda búginde 300 tonnaǵa jýyq balyq ósirilip jatyr. Sondaı-aq Shardara aýdanynda aldaǵy ýaqytta balyq óńdeýmen aınalysatyn taǵy eki shaǵyn kásiporyn ashý josparlanýda.