Shardaralyqtar qaıtarymsyz memlekettik grantpen kásibin órkendetip otyr

ShARDARA. QazAqparat – Túrkistan oblysy, Shardara aýdanynyń turǵyndary qaıtarymsyz memlekettik grantpen kásibin órkendetip otyr. Olar tseh óndirisin damytyp, massaj kabınetin ashqan, dep habarlaıdy QazAqparat tilshisi.

Aýdan ákimdiginiń málimetinshe, jergilikti turǵyndar memlekettik qoldaýdyń arqasynda turaqty jumystaryn taýyp otyr. Máselen, Shardara qalasynyń turǵyny Serik Toqmyrzaev 505 myń teńge kóleminde qaıtarymsyz memlekettik grant alǵan. Ol búgingi tańda plastık tereze men esik shyǵaratyn tseh ashyp, kásibin dóńgeletip otyr. Tseh ónimderine jergilikti turǵyndar tarapynan tapsyrys kóbeıgen. Ázirge barlyq jumysty ózi atqaryp júrgen turǵyn tseh aýmaǵyn ulǵaıtyp, ózge jerlesterin jumyspen qamtýdy josparlaýda.

Memleketten grant alǵan taǵy bir shardaralyq turǵyn Ulnazyq Mysqalbaı qajetti jabdyqtaryn alyp, massaj kabınetin ashqan. Búginde ol kúnine 7-8 adamǵa em-dom jasap, aıyna orta eseppen 200 myń teńge tabys taýyp keledi.

Budan ózge, aýdannyń arnaıy sanatqa jatatyn turǵyndaryna ataýly áleýmettik kómek tóleýge 887,9 mln teńge qarjy qaralǵan. Sondaı-aq, 1-6 jasqa deıingi balalardy kepildendirilgen áleýmettik paketpen qamtýǵa 195,4 mln teńge baǵyttalyp otyr. Qazirgi tańda aýdanda 598 otbasy ataýly áleýmettik kómek alsa, 600-ge jýyq januıa azyq-túlikpen jáne gıgıenalyq zattarmen qamtylǵan.