Shardaralyqtar Arystaǵy jumysyn qorytyndylady

ARYS. QazAqparat – Túrkistan oblysy, Arys qalasyndaǵy 3-shi sektordaǵy qurylys jumystarynyń aıaqtalýyna oraı saltanatty jıyn ótti. Jambyl oblysynyń azamattarymen birge shardaralyqtar da osy sektorda eki aı boıyna ýaqytpen sanaspaı eńbek etti, dep habarlaıdy QazAqparat tilshisi.

Saltanatty sharaǵa Túrkistan oblysy ákiminiń orynbasary Qusman Aıtmuhambetov pen Jambyl oblysy ákiminiń orynbasary Erkebulan Daýylbaev, Jambyl oblystyq máslıhatynyń hatshysy Baǵlan Qarasholaqov pen Arys qalasynyń ákimi Murat Qadyrbek qatysyp, el ıgiligi úshin úlken isterdiń atqarylǵandyǵyn atap ótti.

Іs-shara barysynda arystyq aǵaıyndarǵa kómek qolyn sozý isinde aıanbaı eńbek etken azamattar túrli marapattarǵa ıe boldy. Atap aıtar bolsaq, Shardara aýdany ákiminiń orynbasary Nurmahan Saparov Túrkistan oblysy ákiminiń jáne Túrkistan oblystyq máslıhatynyń Qurmet gramotasymen, «Shardara kommýnalservıs» mekemesiniń dırektory Qurmanǵazy Ákparov Túrkistan oblystyq máslıhatynyń Qurmet gramotasymen marapattaldy. Jalpy 3-shi sektor aýmaǵynda tazalyq jumystaryn júrgizgen jambyldyqtar men shardaralyqtar 4,5 myń tonna qoqysty shyǵardy. Tótenshe jaǵdaıdan zardap shekken turǵyn úılerdi qalpyna keltirdi. Saltanatty jıynda qala ákimdigi qıyn-qystaý kezde arystyq turǵyndardyń jandarynan tabylyp, úlken járdem kórsetken azamattardyń barlyǵyna da alǵystaryn bildirdi. Іs-sharada Jambyl oblystyq fılarmonııasynyń ónerpazdary kontsert qoıyp, halyqqa kóterińki kóńil-kúı syılady. Munan soń Shardara aýdany ákiminiń uıymdastyrýymen 300 adamǵa arnalyp dastarhan jaıyldy.