Shardarada negizgi kapıtalǵa 12 mlrd teńgeden astam ınvestıtsııa tartylǵan

ShARDARA. QazAqparat - Túrkistan oblysy, Shardara aýdanynda negizgi kapıtalǵa tartylǵan ınvestıtsııa kólemi 12 mlrd 52,4 mln teńgeni quraǵan. Bul týraly óńirlik kommýnıkatsııalar qyzmetinde aýdan ákimi Qaırat Joldybaı málim etti, dep habarlaıdy QazAqparat tilshisi.

Aýdan ákiminiń aıtýynsha, óndiris kásiporyndarynda 6 mlrd 573,7 mln teńgeniń ónimi óndirilgen. Nátıjesinde ónerkásip ónimi kórsetkishi boıynsha Shardara aýdany oblysta 5-oryndy ıemdenip otyr.

«Indýstrııaldy-ınnovatsııalyq damý baǵdarlamasy aıasynda aýdanda 1,5 mlrd teńgege 4 ınvestıtsııalyq joba qolǵa alynǵan. Atap aıtqanda, jeke kásipker T.Jalǵasbaevtyń balyq óńdeý zaýytynyń balyqtyń maıy men jemin shyǵarý tsehtarynyń qurylysy; «Turan IT» JShS-niń blokcheın, data tsentr jobasy; Alataý batyr aýylyndaǵy jeke kásipker B.Sarıevtiń jem shyǵarý jobasy; Dostyq aýylyndaǵy «BS Agro Product» JShS qaýynqaq daıyndaý jobasy. Alǵashqy úsh joba bıyl jyl sońynda iske qosylsa, sońǵysy kelesi jyldyń enshisinde», - dedi Qaırat Joldybaıuly.

Budan ózge, aǵymdaǵy jyldyń 9 aıynda aýdandaǵy aýyl sharýashylyǵynyń jalpy ónim kólemi 25 mlrd 969,3 mln teńgeni quraǵan. Al, aýyl sharýashylyǵy salasyna tartylǵan ınvestıtsııa kólemi 1 mlrd 944,6 mln teńgege jetken.

«Qazirge deıin 7 500 ga astam jerden 17 362 tonna maqta terildi. Jıyn-terim jumystary jalǵasýda. Sharýalardy qoldaý maqsatynda kúzgi dala jumystaryn júrgizýge Úkimet tarapynan jeńildetilgen baǵada 3 120 tonna janar-jaǵarmaı bólingen. Sonymen qatar, aýyl sharýashylyǵy taýar óndirýshilerine 10 200 tonna selıtra, 950 tonna ammofos, 650 tonna sýlfat ammonıı, 120 tonna karbamıd tasymaldanyp taratyldy»,- dedi aýdan ákimi.