Shardarada kishkentaı «Pıfagor» turady
Osydan birshama ýaqyt buryn áleýmettik jelide esepke júırik balanyń vıdeosy taraǵan bolatyn. Kúrdeli sandardy qosýdy qınalmaı-aq aýyzsha eseptep jatqan onyń áreketi kópshilikti tań qaldyrdy.
Óziniń zerektigimen eldi súısintken tórt jasar Islam Kýpbaı Shardara aýdanyna qarasty Egizqum eldi mekeniniń turǵyny bolyp shyqty. Bolashaǵynan úlken úmit kúttirip otyrǵan balǵyn búldirshinniń erekshe qabiletin baıqaǵan dostary qyzyq kórip beıne taspaǵa túsirip alǵan. Al, ol vıdeo birden áleýmettik jeli arqyly elge tarap ketti.
Islam - otbasyndaǵy tórtinshi perzent, úıdiń kenjesi. Ákesi Kanatbek Saıtmambetov balasynyń boıyndaǵy zerektigin atasynan daryǵan bolar dep topshylaıdy. Óıtkeni, Islamnyń atasy esepti «shemishkeshe shaǵatyn», myqty matematık bolǵan. Teginde, qanynda bar qasıet urpaqtan-urpaqqa jalǵasyp, áıteýir bireýine baq bolyp qonary aıan. Bul sózdi anasy Gúlnar Kanarbaevada quptap otyr.
Sondaı-aq, Islamnyń aǵa-ápkeleri de kileń beske oqıtyn ozat oqýshylar sapynda. Bálkim, daryndy balanyń esepke degen júıriktigi, sol baýyrlarynyń kúndelikti sabaqqa degen qyzyǵýshylyǵynan týǵan bolýy da múmkin.
Qalaı desek te, qarshadaı balanyń ójettigi men qyraǵylyǵy, oı júıriktigi men zerektigi jurtty áli de tańqaldyrý ústinde.
Islam búginde balabaqshaǵa baryp júr. Keı kúnderi áldene jaqpaı qalsa, burtıyp, ózine «demalys» jarııalap alatyn balalyǵy da joq emes. Onysy ózine jarasady. Tili 3 jasynda kesh shyqsa da, qazir qatarlastarynyń aldy bolyp keledi.
Búginde Islamdy aýyldastary «Esep shyǵaratyn bala» dep atap ketken. Onyń ózinen de aty-jónin surasań, dál osylaı jaýap qatady. Armany asqaq búldirshin bolashaqta úlken matematık bolǵysy keledi.
Vıdeodan alynǵan kadr