Shardarada kásipkerler kópbalaly anaǵa baspana syılady

ShARDARA. QazAqparat – Túrkistan oblysy Shardara aýdanynda kópbalaly anaǵa baspana tartý etildi. Buǵan deıin baspana taýqymetin tartyp kelgen Qarlyǵash Manapovaǵa el azamattary úsh bólmeli úıdiń kiltin tabys etti, dep habarlaıdy QazAqparat tilshisi.

El aǵalary men jomart kásipkerler birigip, oblysta júzege asyrylyp jatqan «Qamqorlyq» baǵdarlamasy aıasynda kópbalaly otbasyna saýapty is jasady.

Atalmysh sharaǵa Shardara aýdany ákiminiń orynbasary Baýyrjan Shompıev qatysyp, úıli bolǵan 7 balaly otbasyn quttyqtady. Aldaǵy ýaqytta da qoǵamdy izgilikke, meıirimge jeteleıtin bastamalar jalǵasa bererine senim bildirdi.

Aıta keteıik, óńirde «Nur Otan» partııasy Túrkistan oblystyq fılıalynyń úılestirýimen «Qamqorlyq» baǵdarlamasy aıasynda 1643 otbasy arnaıy tizimge alynǵan. Oblys ákimi Ómirzaq Shókeevtiń tikeleı baqylaýynda turǵan baǵdarlama jurtshylyq tarapynan qyzý qoldaýǵa ıe boldy. Partııa fılıaly, osy salaǵa jaýapty basqarma, aýdan, qala ákimdikteri tarapynan tıisti jumystar atqarylýda.

Osy rette Shardara aýdanynda da ilkimdi is bar ekenin aıta ketken jón. Qazirdiń ózinde oblys aýmaǵynda 10-ǵa jýyq otbasy baspanaly bolyp úlgerdi. Eldiń jomart, otanshyl kásipkerleri ıgi bastamaǵa aıryqsha úles qosýda. Baǵdarlama aıasynda turǵyndarǵa azyq-túlik, qarjylaı jáne ózge de kómekter kórsetilip jatyr. Bul otbasylarǵa 1135 kýrator bekitilgen.