Shardara sý qoımasynyń 77 paıyzy toldy - Túrkistan oblystyq TJD
Búginde Shardara sý qoımasynyń tolýy 77 paıyzdy qurap otyr. Bul kórsetkishti ótken jylǵy sýdyń kólemimen salystyrsaq 41 paıyzǵa artqanyn kóremiz. Qazirgi kezde sý qoımasyna 1176 m3/sek kelip, 1011 m3/sek sý shyǵýda. Al, Kóksaraı sý rettegishi 16 paıyzǵa tolǵan.
«Jyl basynda kóktemgi tasqyn sýdy qabyldaý úshin sý rettegishi bos bolatyn. Búgingi kúnge qoımaǵa sekýndyna 300 tekshe metr sý jınalýda. Qyzylorda oblysyna sekýndyna 600 tekshe metr jiberilip jatyr» - delingen Túrkistan oblysy TJD baspasóz qyzmeti taratqan habarlamada.
Syrdarııa ózeni boıynda 97,5 shaqyrymdy quraıtyn sý tasqynyna qarsy qorǵanys dambalary turǵyzylǵan. Mamandardyń aıtýynsha, olardyń barlyǵy qalypty jaǵdaıda. Ótken jyly Shardara aýdany, Sútkent eldi mekeni tusyndaǵy qorǵanys dambasy kúrdeli jóndeýden ótken. Syrdarııa ózeninen bastaý alatyn kanaldardyń tospalary bekitilip, topyraqpen nyǵaıtylǵan. Ózen boıyndaǵy eldimekenderde ornatylǵan «Úlken sý» lokaldy qulaqtandyrý júıesi daıyndyqqa keltirilgen. Sondaı-aq, «Shardara» sý qoımasyna baılanysty tabıǵı jáne tehnogendik sıpattaǵy tótenshe jaǵdaılardan qorǵaý jospary jasalǵan.