Shardara sý qoımasynda móńke jáne sazan balyqtar qyrylyp jatyr

ShARDARA. QazAqparat - Shardara sý qoımasynda balyqtar jappaı qyrylyp jatyr, dep habarlaıdy QazAqparat.

Bul jaıynda balyq sharýashylyǵy komıtetiniń baspasóz hatshysy Aslan Jeńisuly málimdedi.

Onyń aıtýynsha, 5 sáýirdegi reıd barysynda Aral-Syrdarııa oblysaralyq basseındik balyq sharýashylyǵy ınspektsııasy, Túrkistan balyq ınspektsııasy bóliminiń balyq ınspektorlary Shardara sý qoımasynyń №2 ýchaskesiniń jaǵasynda («Vita» JShS-ne bekitilgen) balyq shabaqtarynyń jınalyp qalǵanyn kórgen.

Olar balyqtardyń qyrylý faktisin tirkedi.

Kózben sholyp qaraý kezinde shabaqtardyń qabyrshaqty jamylǵysynda ózgeris bary belgili boldy.

Onyń kóbi - móńke jáne sazan balyqtar. Balyq ınspektorlary men qoryqshylar salmaǵy orta eseppen 50-60 gramm bolatyn 4 kg shabaq jınady.

Jáne olardy ýtılızatsııalaý jumystaryn uıymdastyrdy.

Shardara qalasy boıynsha veterınarııa qyzmeti zertteý úshin shabaqtardyń synamasyn aldy.

«Aral-Syrdarııa oblysaralyq basseındik balyq sharýashylyǵy ınspektsııasy olardyń qyrylý qaýpi jáne ólimi anyqtalǵan kezdegi ózara is-qımyl shemasyna sáıkes búkil múddeli organdarǵa habar berdi. 6 sáýirde Túrkistan oblysy boıynsha ekologııa departamenti men «Balyq sharýashylyǵy ǵylymı-óndiristik ortalyǵy» JShS Aral fılıaly sý men balyqtan synama alýdy josparlap otyr», - deıdi Aslan Jeńisuly.

Zerthanalyq zertteý nátıjesi boıynsha qorytyndy ázirlenedi.

Aıta keteıik, Shardara sý qoımasy Túrkistan oblysy aýmaǵyndaǵy Syrdarııa ózeninde ornalasqan. 1966 jyly salynǵan.

Sý qoımasy 4 ýchaskege bólingen jáne kásipshilik balyq aýlaýdy júrgizý úshin tórt paıdalanýshyǵa bekitilgen.