Shardara aýdanyna jańa ákim taǵaıyndaldy

ShYMKENT. QazAqparat - Búgin Qazaqstan Respýblıkasy Prezıdenti Ákimshiliginiń jáne Shardara aýdandyq máslıhatynyń kelisimi boıynsha Ońtústik Qazaqstan oblysy ákiminiń ókimimen Shardara aýdanynyń ákimi laýazymyna Bolatbek Dúısenbekuly Qystaýov taǵaıyndaldy, dep habarlaıdy oblys ákimdiginiń baspasóz qyzmeti.

Jańa ákimdi aýdan aktıvine oblys ákimi J.Túımebaev tanystyryp, laýazym ıesiniń jumysyna tabys tiledi.

Memlekettik qyzmette, partııa jumysynda mol tájirıbesi bar bilikti basshy retinde jańadan taǵaıyndalǵan aýdan ákimine óńir basshysy birqatar naqty tapsyrmalar júktedi. Máselen, ınvestıtsııa tartý baǵytyndaǵy jumystardy jandandyrýdy, týrızm ındýstrııasyn damytýdy jáne jol boıyndaǵy servısti zaman talabyna sáıkestendirip damytý qajettigin, aýdanda jumyssyzdyq  deńgeıin barynsha tómendetýdi, múgedekterdiń ómir súrý jaǵdaıyn  jaqsartý úshin qolaıly orta qurýdy mindettedi. Sonymen qosa, aýdannyń áleýetin eskere otyryp, shaǵyn jáne orta bızneske qoldaý bildirip, kásipkerlikti damytýdy  jáne aýyl sharýashylyǵy salasynda jańa tehnologııalardy qoldana otyryp damytýdy aıtty. Sondaı-aq, jaqyn arada aýdannyń  damý josparyn jasap, oblys ákimdiginde tanystyrýdy tapsyrdy.                                                                              

Aıta keteıik, B.D.Qystaýov 1973 jyly 15 tamyzda týylǵan, bilimi joǵary, mamandyǵy boıynsha ekonomıst.

Eńbek jolyn 1990 jyly Lenın aýdany «Kúıik» asyl tuqymdy zaýytynyń asyl tuqym bóliminiń esepshisi bolyp bastaǵan. 1995-2016 jyldary Ońtústik Qazaqstan oblysy ákimshiligi ekonomıka basqarmasynyń jetekshi mamany, Ońtústik Qazaqstan oblysy ákimshiligi qarjy basqarmasynyń bas mamany, sektor meńgerýshisi, bólim bastyǵy, Tólebı, Qazyǵurt aýdandyq qarjy bólimderiniń meńgerýshisi, Qazyǵurt aýdany ákiminiń orynbasary, Qazyǵurt aýdanynyń ákimi retinde eńbek etken.

2016 jyldyń sáýir aıynan bastap «Nur Otan» partııasy Ońtústik Qazaqstan oblystyq fılıaly tóraǵasynyń birinshi orynbasary laýazymyn atqaryp keldi.