«Shapaǵat» bazary jáne basqa da arzanǵa satylyp ketken nysandar memleketke qaıtarylady

ASTANA. QazAqparat - Ekonomıkalyq resýrstardy zańsyz shoǵyrlandyrýǵa qarsy is-qımyl máseleleri jónindegi vedomstvoaralyq komıssııa olıgopolııanyń menshigine berilgen obektilerdi satyp alý-satý shartyn jaramsyz dep taný jáne memleketke qaıtarý jumysyn júrgizip jatyr, dep habarlaıdy QazAqparat.

Búgingi kúni komıssııanyń resmı ókili Zeıin Álipbektiń aqparaty boıynsha, sotta jalpy 13,5 mlrd teńgege jýyq múlikti memlekettik menshikke qaıtarý týraly prokýrordyń 10 talaby qaralyp jatyr.

Onyń ishinde astanalyq «Shapaǵat» bazary, Shymkenttegi qoqysty qaıta óńdeý kásiporny – «Taza qala» MKK jáne «LTD Turmys» JShS, Shymkenttegi «Qazaq ınnovatsııalyq ýnıversıteti» JShS-ǵa tıesili, quny 4,5 mlrd teńge bolatyn 150 gektar jer ýchaskesi; «Saryaǵash» sanatorıı-kýrorttyq keshenindegi 1,44 gektar jer, Aqmola oblysyndaǵy 17 myń gektar jer ýchaskesi, Almatydaǵy quny 2,9 mıllıard teńge bolatyn 3,84 gektar jer ýchaskesi, baǵalaý quny 1,5 mıllıard teńge bolatyn «Naıza-BN» JShS («Barys-4» bazary) jarǵylyq kapıtalynyń 65% bar.

- Budan basqa, aktıvterdi keıinnen shyǵarý, ekonomıkalyq resýrstardy monopolııalyq shoǵyrlandyrý maqsatynda memlekettik múlikti zańsyz ıelený, mindettemelerden, onyń ishinde salyqtyq mindettemelerden jaltarý faktilerin anyqtaý turǵysynan azamattyq ister boıynsha sot aktilerine tekserý júrip jatyr. Qazir 21 mlrd teńgege olıgopolııa ókilderiniń paıdasyna shyǵarylǵan sot sheshimderin qaıta qaraý týraly Bas prokýratýranyń 11 narazylyǵy Joǵarǵy sottyń qaraýynda jatyr, - dep habarlady Zeıin Álipbek.

Eske sala keteıik, úsh aı ishinde memleketke kelgen 523 mlrd teńge zalal ótelip, zańsyz alynǵan aktıvter qaıtarylǵanyn jazǵan bolatynbyz.