Shańyraq kúni Qonaevta otasqanyna 60 jyl tolǵan qarııalarǵa syı-qurmet jasaldy

<p>QONAEV. KAZINFORM &mdash; Shańyraq kúni Qonaev qalalyq mádenıet bóliminiń basshysy Bıbigúl Shaıkenova Shınıbaevtar otbasymen kezdesip, syı-sııapatyn tabystady.</p>

Aıtý kerek, Shınıbaev Jaqabaı Jumaǵululy men Turǵambaeva Aıtańsyq Rystaıqyzy eki ulyn uıaǵa, úsh qyzyn qııaǵa qondyrǵan qadirli qarııalar. Balalarynan 14 nemere, 21 shóbere súıip otyr.

Áýlettiń otaǵasy Jaqabaı ata temirjol salasynda eńbek etse, al jubaıy 36 jyl ustaz bolǵan. Aıtańsyq apa «Halyq aǵartý isiniń ozyq qyzmetkeri» ataǵymen marapattalyp, zeınetke shyqqan.

«Shańyraq kúnin toılatý dástúrge aınalsa kerek. Qoǵamnyń irgesin qalaýshy ár otbasy tatý, qyzdary qylyqty, uldary minezdi, namysshyl bolsa, el eńsesiniń tik bolǵany. Barsha qazaqstandyqtarǵa baqyt tileımiz. Jas otbasylardyń ajyrasýy azaıyp, ár shańyraq bıik bolsyn! Kez kelgen januıa úshin ár kún mereke bolýy kerek. Bizdiń otasqanymyzǵa 60 jyl boldy. Qyzyǵy men shyjyǵyn qatar kórip jatyrmyz. Osy kúnimizge shúkir, táýbe deımiz», — deıdi qos qarııa.

Sondaı-aq Arna aýyldyq klýbynyń dırektory Anargúl Serikqyzy otaý qurǵanyna 40-50 jyl tolǵan 4 otbasyn merekemen quttyqtap shyqty. Atalar aq batasyn berip, ájeler alǵysyn jaýdyrdy.